एजेन्सी – इंग्लिस प्रिमियर लिगको शीर्षस्थानमा रहेको लन्डन क्लब आर्सनल इएफएल कप अर्थात् कारवाओ कपको तेस्रो चरणबाटै बाहिरिएको छ ।

घरेलु मैदानमा प्रिमियर लिग प्रतिद्धन्द्धी ब्राइटनसँग ३–१ को लज्जास्पद हार बेहोर्दै बाहिरिएको छ । इमिरेट्स स्टेडियम लन्डनमा बुधबार राति भएको खेलमा आर्सनलले सुरुवाती अग्रता लिएपनि त्यसलाई जोगाउन नसक्दा पराजित हुन पुग्यो ।

२०औं मिनेटमा इडवार्ड एनकेइटाको गोलबाट आर्सनलले सुरुवाती अग्रता लिएको थियो । तर, आर्सनलले त्यो अग्रतालाई जोगाउन सकेन । २७औं मिनेटमा ड्यानी वेलवेकले पेनाल्टीमा गोल गर्दै खेललाई १–१ गोलको बराबरीमा ल्याए ।

५८औं मिनेटमा काओरु मितोमाले गोल गर्दै ब्राइटनलाई २–१ ले अघि बढाए । ७१औं मिनेटमा तरिक लाम्पटेले गोल गर्दै ब्राइटनलाई ३–१ को सानदार पूनरागमन जितसहित चौथो चरणमा प्रवेश गराए ।

अर्काे खेलमा प्रिमियर लिग क्लब लिभरपुलले लिग वान क्लब डर्वी काउन्टीलाई टाइब्रेकरमा ३–२ ले पराजित गर्दै चौथो चरणमा प्रवेश गरेको छ ।

एनफिल्डमा बुधबार राति भएको खेलमा ७४ प्रतिशत बल पोसेसन राखेपनि लिभरपुलले डर्वीको बलियो रक्षापङ्ति तोड्न नसक्दा खेल टाइब्रेकरमा लम्बिएको थियो ।

टाइब्रेकरमा लिभरपुललका एलेक्स अक्सलेड चेम्वरलेन, डार्विन नुनेज र हार्भे इलिओटले गोल गर्दा स्टेफन र रोबर्टाे फिर्मिनोले गोल गर्न सकेनन् ।

डर्वीका डेभिड म्याकगोल्डरिक र लोइ सिब्लेले मात्रै गोल गर्न सफल हुँदा कोनोर होउरीहान, क्रेइग र लेविस डब्बिनले गोल गर्न सकेनन् ।