काठमाडौं (हाम्रो खेलकुद)– राष्ट्रिय फुटबल टोलीका पूर्व तीन कप्तानसम्मिलित सिएमजी क्लब संकटा नेपालले भारतको नयाँ दिल्लीमा आयोजित थ्री नेसन्स भेट्रान्स कप फुटबल प्रतियोगिताको उपाधि जितेको छ ।

नयाँ दिल्लीमा शनिबार भएको फाइनलमा दिल्ली सन्डे क्लब भारतलाई ४–० ले हराउँदै उपाधि जितेको थियो । संकटालाई जित दिलाउन राष्ट्रिय फुटबल टोलीका पूर्व फरवार्ड जुमानु राई र विकर्ण श्रेष्ठले समान २ गोल गरेका थिए । जुमानु प्रतियोगिताको सर्वोत्कृष्ट खेलाडी घोषित भएका थिए ।

त्यसअघि शुक्रबार भएको खेलमा संकटाले दिल्ली सन्डे २–१ र भेट्रान्स फुटबल क्लब बंगलादेशलाई ४–० ले हराएको थियो । दिल्लीसँगको खेलमा जुमानु र बंगलादेशको टोलीसँगको खेलमा राष्ट्रिय टोलीका पूर्व मिडफिल्डर राजु तामाङ म्यान अफ दी म्याच चुनिएका थिए ।

राष्ट्रिय फुटबल टोलीका पूर्व कप्तानत्रय उपेन्द्रमान सिंह, बालगोपाल महर्जन, राकेश श्रेष्ठसहित टोलीमा अधिकांश पूर्व राष्ट्रिय खेलाडी रहेका थियए । राष्ट्रिय टोलीका फरवार्ड जुमानु, राजुसहित मडफिल्डर प्रदीप महर्जन, गोलकिपर सुरेन्द्र श्रेष्ठ, डिफेन्डर चुन थापालगायतका थिए ।

टोलीका अन्य खेलाडीमा राजकुमार केसी, कल्याण खड्गी, विजय जायाकु श्रेष्ठ, रमेश गुरुङ, सन्तोष बस्नेत, विष्णुबहादुर सुनार, राजन महर्जन, रञ्जित लामा थिए । आशिषमान सिंह व्यवस्थापक रहेको टोलीको प्रशिक्षकमा राजेश मानन्धर, फिजियो राजु दाहाल र अफिसियलमा सुदन बज्राचार्य रहेका थिए ।