एजेन्सी – इंग्लिस क्लब ब्राइटनका तीन खेलाडीले इक्वेडरको विश्वकप टोलीमा स्थान बनाएका छन् । प्रशिक्षक गुस्ताभो अलफारोको विश्वकपको लागि २६ सदस्यीय टोली घोषणा गरेको हो ।

टोलीमा ब्राइटनबाट खेल्ने लेफ्टब्याक पर्भिस एस्टुपिनान, मिडफिल्डर मोइसेस काइसेडो र जेरेमी सार्मिएन्टोले स्थान बनाएका छन् ।

३५ गोलका साथ सर्वाधिक गोलकर्ता रहेका एनर भ्यालेन्सियाको कप्तानीमा इक्वेडरले कतार विश्वकप खेल्नेछ । इक्वेडरले आइतवार विश्वकपको उद्घाटन खेलमा आयोजक कतारसँग खेल्नेछ ।

डिफेन्डर बायरन कास्टिलो भने टोलीबाट बाहिरिएका छन् । कास्टिलो कोलम्वियाली रहेको र उनले इक्वेडरबाट खेल्न नपाउने भन्दै चिली र पेरुले इक्वेडरलाई विश्वकपबाट बाहिर निकाल्ने प्रयास गरेका थिए । तर, फिफा र कोर्ट अफ आर्बिट्रेसन फर स्पोर्ट्स दुवैले इक्वेडरलाई खेल्न अनुमति दिएका छन् ।

यद्यपि छनोटका ८ खेल खेलेका उनले विश्वकपको अन्तिम टोलीमा भने स्थान बनाउन सकेनन् । समूह ए मा इक्वेडरसँगै आयोजक कतार, सेनेगल र नेदरल्यान्ड्स छन् ।

पूर्ण टोली
गोलरक्षक – मोइसेस रामिरेज, एलेक्सान्डर डोमिनगुएज र हर्नान गालिन्डेज
डिफेन्डर – पिएरो हिनकापी, रोबर्ट अर्बोलेडा, पर्भिस एस्टुपिनान, एन्जेलो प्रेसियाडो, ज्याक्सन पोरोजो, जेभियर एरेगा, डिएगो पालासिओस, फेलिक्स टोरेस र विलियम पाचो
मिडफिल्डर – कार्लोस ग्रुजो, जोस सिफुएन्ट, एलन फ्रान्को, मोइसेस काइसेडो, एन्जल मेना, जेरेमी सार्मिएन्टो, जेग्सन मेन्डेज, एर्टन प्रेसियाडो, गोन्जालो प्लाटा र रोमारियो इवारा
फरवार्ड – जोर्काइफ रेस्को, केभिन रोड्रिग्वेज, माइकल एस्ट्राडा र एनर भ्यालेन्सिया