एजेन्सी – खुट्टाको चोटका कारण सेनेगलका फरवार्ड साडियो मानेले फिफा विश्वकप कतार २०२२ को पहिलो खेल गुमाउने भएका छन् ।

सेनेगल फुटबल फेडेरेसन (एफएसएफ) ले आफ्नो मुख्य फरवार्ड मानले चोटका कारण पहिलो खेल गुमाउने बताएको छ ।जर्मन क्लब बायर्न म्युनिखका फरवार्डलाई गत साता चोटका बावजुत पनि टोलीमा समावेश गरिएको थियो ।

जर्मन च्याम्पियन्स बायर्नले ३० वर्षीय मानेले चोट बोकेको बताएपनि सेनेगलका प्रशिक्षक अलिउ सिसेले मानेलाई शल्यक्रियाको आवश्यकता नरहेको बताउँदै टोलीमा समेटेका थिए ।

समूह ‘ए’ मा रहेको सेनेगलले विश्वकपको पहिलो खेलमा सोमबार नेदरल्यान्ड्ससँग खेल्दैछ । त्यसपछि सेनेगलले आयोजक कतारसँग २५ नोभेम्बर इक्वेडरसँग २९ नोभेम्बरमा खेल्दैछ ।

‘हामीले साडियोबिना पहिलो खेल खेल्नु र जित्नुपर्नेछ ।’ एफएसएफका बोर्ड सदस्य अब्दुलाये सोएले एपीलाई भने, ‘कसैले यो चाहँदैनथ्यो, तर हामीले यो भोग्नुपर्नेछ । दुई पटक अफ्रिकी फुटबलर अफ द इयरको अनुपस्थिति हाम्रो लागि ठुलो मुल्य चुकाई हो ।’

अफ्रिका कप अफ नेसन्सको फाइनलमा इजिप्टलाई टाइब्रेकरमा पराजित गर्दै फेब्रुअरीमा पहिलोपटक महादेशीय च्याम्पियन बन्दा उनले विजयी पेनाल्टीमा गोल गरेका थिए ।

इजिप्टविरुद्ध मानेले दुई महिनाभित्र यस्तै उपलब्धि दोहोर्याएको थियो । अफ्रिका कप अफ नेसन्समा टाइब्रेकरमा निर्णायक गोल गरेका मानेले कतार विश्वकपको प्ले अफमा पनि इजिप्टविरुद्ध नै पेनाल्टीमा निर्णायक गोल गरेका थिए ।