कतार (हाम्रो खेलकुद) – फिफा विश्वकप कतार २०२२ अन्तर्गत नेदरल्यान्ड्सले समूह चरणको पहिलो खेलमा सेनेगललाई हराउँदै विजयी सुरुवात गरेको छ ।

अल थुममा रंगशालामा भएको खेलमा नेदरल्यान्ड्सले २-० को जित दर्ता गरेको हो । नेदरल्यान्ड्सको जितमा कोडी गाक्पोले र डेभि कलासेनले १-१ गोल गरे । दुवै गोल दोस्रो हाफमा सम्भव भएको थियो ।

बराबरीतर्फ उन्मुख देखिएको खेलमा डच टोलीलाई गाक्पोले सुरुवाती अग्रता दिलाएका थिए । उनले ८४ औं मिनेटमा हेडरमार्फत गोल गरेका थिए । फ्रेंकी डे जोङको लामो पासमा गोलरक्षक एडुआर्ड मेन्डी ढिलो हुन पुग्दा गाक्पोको हेडर गोल भएको थियो ।

दोस्रो हाफको इन्ज्युरी समयको आठौं मिनेटमा नेदरल्यान्ड्सले अग्रता दोब्बर पार्यो । मेम्फिस डिपाएको सुरुवाती प्रहारलाई गोलरक्षक मेन्डीले विफल पारेपनि रिबाउन्डमा डेभि क्लासेन गोल गर्न सफल भए ।

निकै प्रतिस्पर्धात्मक खेलमा दुवै टोलीले गोलका लागि अवसर सिर्जना गरेपनि त्यसलाई सदुपयोग गर्न सकेनन् । पहिलो हाफ गोलरहित बराबरीमा सकिएको थियो । दोस्रो हाफमा सेनेगल केहि फिका देखिएको थियो । खेलको ७३ औं मिनेटमा चेखु कोउयाटे घाइते भएर निस्केपछि सेनेगल समस्यामा परेको थियो ।

यस जितसँगै नेदरल्यान्ड्सको ३ अंक भएको छ । समूहको अंक तालिकामा डच टोली इक्वेडरसँग गोल र अंक बराबरीमा छ । इक्वेडरले उद्घाटन खेलमा कतारलाई २-० ले हराएको थियो ।