कतार (हाम्रो खेलकुद) – फिफा विश्वकप कतार २०२२ अन्तर्गत समूह एच को खेलमा उरुग्वे र दक्षिण कोरिया भिड्दैछन् । खेल नेपाली समयअनुसार साँझ ६:४५ बजे एजुकेसन सिटी रंगशालामा हुनेछ ।

हालसम्म विश्वकपमा दुई पटक खेलेका यी टोलीबीच उरुग्वेले दुवै खेलमा जित निकालेको छ । सन् १९९० मा १-० ले विजयी उरुग्वेले सन् २०१० मा २-१ को जित दर्ता गरेको थियो । उरुग्वे १४ औं पटक विश्वकप खेल्दैछ भने कोरिया लगातार दशौं संस्करणका लागि छनोट भएको हो ।

सन् १९३० र १९५० को विजेता उरुग्वेले सन् २०१० मा सेमिफाइनल र सन् २०१८ मा क्वाटरफाइनल यात्रा तय गरेको थियो । टोलीका ४ खेलाडी चौथो विश्वकप खेलिरहेका छन् । आक्रमणमा लुइस सुआरेज र एडिन्सन काभानीसँगै डार्विन न्युनेजको उपस्थितिले टोलीलाई बलियो बनाएको छ ।

कोरियाले पछिल्लो दुई संस्करणमा समूह चरण पार गर्न सकेको छैन । सन् २००२ मा सह-आयोजकको भूमिका रहँदा सेमिफाइनल पुगेको टोली सन् २०१० मा नकआउट चरण पुग्न सफल रहेको थियो । यसपटक विश्व स्टार ह्युङ मिन सनको साथ टोलीलाई छ । अनुहारमा चोट लागेपछि शल्यक्रिया गरेका उनी सुरक्षा मास्क लगाएर खेल्नेछन् ।

अन्तर्राष्ट्रिय खेल यी दुईबीच ८ पटक भेट भएको छ । उरुग्वेले ६ खेल जित्दा कोरिया एक खेलमा मात्र जित निकाल्न सफल भएको छ । १ खेल भने बराबरीमा सकिएको छ । सन् २०१८ मा भएको मैत्रीपूर्ण खेलमा कोरियाले एकमात्र जित हासिल गरेको थियो ।

हालसम्म विश्वकपमा उरुग्वेले ५६ खेल खेल्दा २४ जित, १२ बराबरी र २० हार भोगेको छ । कोरियाले ३४ खेल खेल्दा ६ जित, ९ बराबरी र १९ हार बेहोरेको छ ।

अन्तिम टोली :

उरुग्वे :

गोलरक्षक : सर्जियो रोसे, फर्नान्डो मुस्लेरा, सबास्टियन सोसा

डिफेन्डर : डिएगो गोडीन, जोसे मारिया जिमिनेज, रोनाल्ड अराउजो, सबास्टियन कोआटेस, मार्टिन कासेरेस, माथिअस ओलिभिएरा, गिलेर्मो भारेला, जोसे लुइस रोड्रीग्वेज, माटीयास भिना

मिडफिल्डर : फेडे भालभेर्डे, रोड्रीगो बेन्टान्कुर, माटीआस भेचिनो, लुकास टोरेरा, म्यानुएल उगार्टे, निकोलस डे ला क्रुज, जर्जियन डे आरास्केता, फाकुन्डो पेलिस्त्री, फाकुन्डो टोरेस, अगुस्टिन कनोबियो

फरवार्ड : लुइस सुआरेज, एडिन्सन काभानी, डार्विन न्युनेज, म्याक्सिमिलियन गोमेज

दक्षिण कोरिया :

गोलकिपर : किम स्युङ–ग्यु, जो ह्योन यु, सङ बुम–क्युन

डिफेन्डर : किम मिन जे, किम योङ ग्वोन, क्वोन क्युङ वोन, चो यु मिन, किममुन ह्वान, युन जोङ ग्यु, किम ताइ ह्वान, किम जिन सु, होल चुल

मिडफिल्डर : जोङ वु योङ, सान जुन हो, पाइक सुङ हो, ह्वाङ इन बुम, लि जेसुङ, क्वोन चाङ हुन, ज्योङ वु योङ, लि काङ इन, ना साङ हो, सङ मिन क्यु

फरवार्ड : सन ह्युङ मिन, ह्वाङ ही चान, ह्वाङ यी जो, चो ग्वी सुङ