सुबास हुमागाईं, कतार

फिफा विश्वकप कतार २०२२ अन्तर्गत समूह सी को खेलमा साउदी अरेबियाले अर्जेन्टिनालाई पराजित गर्दै विश्वकप इतिहासमै सबैभन्दा आश्चर्य पार्ने नतिजा निकाल्यो । अर्जेन्टिनालाई २-१ ले पराजित गर्दै साउदीले सारा विश्वको ध्यान आफूतर्फ तानेको थियो ।

लुसेल रंगशालामा ८८ हजार दर्शकमाझ भएको खेलको अन्तिम समय भने निकै रोमान्चक थियो । निर्धारित ९० मिनेट समय सकिएपछि फोर्थ अफिसियलले ८ मिनेट समय थपिएको जानकारी दिन बोर्ड उठाए । रेफ्रीले ८ मिनेट समय थपिएको देखाउने बितिक्कै साउदीका समर्थकहरु सिठी बजाएर उक्त निर्णयप्रति असन्तुष्टि जनाउन थाले ।

इन्ज्युरी समय चलिरहँदा साउदीका खेलाडी घाइते भएपछि रेफ्रीले केहीबेर खेल रोक्नुपर्यो । यसबेला भने अर्जेन्टिनाका खेलाडी र समर्थकले रेफ्रीप्रति असन्तुष्टि जनाए । स्लोभेनियाका रेफ्री स्लाभ्को भिन्चिचले आफ्नो घडीतर्फ संकेत गर्दै समय खेर नहुने बताए । साउदीले इन्ज्युरी समयको नवौं मिनेटमा खेलाडी परिवर्तन पनि गर्यो ।

दोस्रो हाफमा ८ मिनेट समय थप गरिएकोमा रेफ्रीले उक्त समय काटेपछि पनि खेल चलाइरहे । साउदीका प्रशिक्षक हर्भ रेनार्ड लगायत बेन्चका खेलाडी टचलाइनमा उभिएर घडी हेर्न संकेत दिइरहेका थिए । सँगसँगै साउदी समर्थकपनि निरन्तर होहल्ला गर्दै समय सकिएको संकेत दिन खोजेका थिए । तर रेफ्री भिन्चिचले १३ मिनेट काटेपछि मात्र अन्तिम व्हिसल फुके ।

इंग्ल्यान्ड र इरानबीच भएको खेलमा रेफ्रीले पहिलो हाफमा १४ मिनेट र दोस्रो हाफमा १० मिनेट थप गरेका थिए । तर रेफ्रीले पहिलो हाफमा १४ मिनेट र दोस्रो हाफमा १३ मिनेट इन्ज्युरी समयको खेल खेलाए । इरानले दोस्रो हाफको इन्ज्युरी समयको १३ औं मिनेटमा गोल समेत फर्काएको थियो ।

यसपटक विश्वकपमा विगतका तुलनामा इन्ज्युरी समयमा धेरै समय थपिएको देखिन्छ । अधिकांश खेलमा त इन्ज्युरी समय थप गरिएको भन्दा बढी समय रेफ्रीले खेलाएका छन् । फिफाले यसपटक खेलमा बल रोकिएको हरेक समयको हिसाब गर्दै इन्ज्युरी समय थपेको छ । खेलमा ढिलासुस्तीका कारण खेर गएको समयलाई इन्ज्युरी समयमा थप्ने निर्णय फिफाले गरेसँगै यसपटक इन्ज्युरी समय धेरै हुन पुगेको हो । अग्रता लिएको टोलीले समय खेर फाल्ने प्रवृत्तिलाई निरुत्साहित गर्न यो कदम चालिएको फिफाले जनाएको छ ।

विश्वकप सुरु हुनुअघि रेफ्री समितिका अध्यक्ष पिएरलुइजी कोलिनले यसबारे जानकारी पनि दिएका थिए । ‘विश्वकप पृथ्वीकै सबैभन्दा महत्त्वपूर्ण प्रतियोगिता हो । हामीले रेफ्रीलाई खेलमा कुनै घटना हुँदा खर्चेको समय राम्रो हिसाब गर्न भनेका छौं । गोल गरेपछि खुसियाली मनाउँदा, खेलाडी परिवर्तन गर्दा, खेलाडीलाई चोट लाग्दा, भीएआर हेर्दा लागेको समय हिसाब गर्नुपर्छ,’ उनले भने ।

‘हरेक गोलमा खुसियाली मनाउँदै गर्दा समय खर्च हुन्छ । अब एक हाफमा २-३ गोल हुन्छ भने ४-५ मिनेट थप्नैपर्छ । खेर गएको समयको पनि खेल होस् भन्ने हाम्रो लक्ष्य हो,’ कोलिनाले प्रष्ट पारेका थिए । उनले भनेजस्तै खेलाडीलाई चोट लाग्दा, गोलपछि र खेलाडी परिवर्तन गर्दाको समय रेफ्रीहरुले थप्दै आएका छन् । त्यसैले पनि यसपटक इन्ज्युरी समय धेरै हुँदा खेलमा रोमान्च थपिएको छ ।