एजेन्सी – फिफा विश्वकप कतार २०२२ मा उपाधि दावेदारको रुपमा अर्जेन्टिनाले शनिबार राति दोस्रो खेलमा मेक्सिकोसँग खेल्दैछ ।

खेल राति १२ः४५ बजेपछि हुनेछ । पहिलो खेलमै साउदी अरेबियासँग २–१ को नमिठो हार बेहोरेको अर्जेन्टिनाले शनिबार राति मेक्सिकोको सामना गर्दा त्याे हारलाई बिर्सदै अघिल्लो चरण पुग्ने सम्भावना बलियो पार्न निश्चित जित आवश्यक हुनेछ ।

साउदी अरेबियासँगको हार अर्जेन्टिनाले ३२ वर्षपछि विश्वकपको पहिलो खेलमा हार बेहोरेको हो । लियोनेल मेस्सीले पेनाल्टीमार्फत अग्रता दिलाएपनि दोस्रो हाफमा ८ मिनेटको अन्तरमा अर्जेन्टिनाले दुई गोल खाँदै स्तब्ध बन्न पुग्यो ।

साउदी अरेबियासँगको हारसँगै अहिले समर्थकमाझ यही हारलाई लिएर अरबी भाषामा भन्ने गरिएको छ, ‘मेसी कहाँ छन् त ? हामीले उनको आँखा फुटायौं ।’ यो नतिजाले मेस्सीमात्र होइनन्, अर्जेन्टिना पनि चर्को दबाबमा छ । मेक्सिकोसँगको नतिजा आँफु अनुकुल पार्न नसके विश्वकपको समूह चरणबाटै बाहिरिने डर छ । त्यसकारण अर्जेन्टिना मेक्सिकोविरुद्ध जसरी पनि जित निकाल्दै समूह चरण पार गर्ने सम्भावना जीवित पार्न चहान्छ ।

यता, अर्जेन्टिनालाई रोक्न मेक्सिको अर्जेन्टिनी जेरार्डाे मार्टिनोकै प्रशिक्षणमा छ । २०१४ देखि २०१६ सम्म अर्जेन्टिनाको टोली सम्हालेको मार्टिनोले कोपा अमेरिका कपमा उपाधि जिताउन नसकेपछि अर्जेन्टिना छाडेका थिए । अहिले त्यही प्रशिक्षक मार्टिनो अर्जेन्टिनालाई रोक्दै आफ्नो टोली मेक्सिकोलाई नकआउट चरण पु¥याउने योजनामा हुनेछन् ।

समूह ‘सी’ मा पोल्यान्ड र मेक्सिकोको गोलरहित बराबरीले अर्जेन्टिनालाई कहे राहत मिलेको छ । मेक्सिकोविरुद्धको विश्वकपको तीनै भेटमा अर्जेन्टिना विजयी छ । अर्जेन्टिना मेक्सिकोलाई विश्वकपमा लगातार चार हार चखाउन चहान्छ ।

त्यस खेलमा पाँचौं पटक विश्वकप खेलिरहेका मेक्सिकोका गोलरक्षक गुइलेर्माे ओचोआले रोबर्ट लेवान्डोस्कीको पेनाल्टी प्रहारलाई बचाएका थिए । उनी पुनः एकपटक अर्जेन्टिनाविरुद्ध नायक हुन सक्नेछ ।

अर्जेन्टिनाले मेक्सिको विरुद्धको फिफा विश्वकपका आफ्ना अघिल्ला तीनवटा खेलहरू जितेको छ, सबैभन्दा पछिल्लो सन् २०१० मा ३–१ को जित र त्यसअघि सन् १९३० मा ६–४ को जित निकालेको थियो ।

अर्जेन्टिनाले विश्वकपमा ८२ खेल खेल्दा ४३ जित, १५ बराबरी र २४ हारको नतिजा निकालेको छ । यता, मेक्सिकोले ५८ खेल खेल्दा १६ जित, १५ बराबरी र २७ हार बेहोरेको छ ।

अर्जेन्टिना र मेक्सिकोबीच हालसम्म ३५ भेट हुँदा अर्जेन्टिनाले १६ खेलमा जित निकाल्दा १४ खेल बराबरीमा सकिएको छ । ५ खेल मेक्सिकोले आफ्नो पक्षमा पारेके छ ।