कतार (हाम्रो खेलकुद) – फिफा विश्वकप कतार २०२२ अन्तर्गत समूह सी को खेलमा पोल्यान्डले पहिलो हाफमा साउदी अरेबिया विरुद्ध १-० को अग्रता लिएको छ ।

निकै प्रतिस्पर्धात्क खेलमा साउदीले सुरुवाती समयमा बनाएको दबाबलाई बलियो आक्रमणमा बदल्न सकेन । यता पोल्यान्डले प्राप्त अवसर सदुपयोग गर्दै अग्रता लियो । पोलिस गोलरक्षक वजसिएक सेचेज्नीले पेनाल्टी सहित केहि उत्कृष्ट बचाउ गर्दै पोल्यान्डको अग्रता कायम राखेका छन् ।

खेलको १३ अ‍ौं मिनेटमा साउदीको अग्रतासामु पोल्यान्डका गोलरक्षक वजसिएक सेचेज्नी बाधक बने । मोहमद कानोले पेनाल्टी क्षेत्र भित्रबाट पहिलो टचमै गरेको शक्तिशाली प्रहार सेचेज्नीले उत्कृष्ट बचाउ गरे ।

खेलको ४० अ‍ौं मिनेटमा पोल्यान्डले पिटर जिलेन्स्कीको गोलमा अग्रता लियो । रोबर्ट लेवान्डस्कीले पेनाल्टी क्षेत्र भित्रबाट दिएको पासलाई जिलेन्स्कीले गोल गरेका थिए । गोलरक्षक बाहिर निस्केको अवस्थामा उनलाई बिट गर्दै जिलेन्स्कीलाई पास दिएका थिए ।

४४ अ‍ौं मिनेटमा साउदीले पेनाल्टीमार्फत खेलमा फर्कने अवसर पायो । भिडियो एसिसेन्ट रेफ्रीले अल शेहरीलाई पेनाल्टी क्षेत्र भित्र लडाएको फलमा पेनाल्टी दिएका थिए । तर साउदीका लागि सलेम अल दोसारीले पेनाल्टी चुकाएछि रिबाउन्डमा मोहमद अल्बुरेकले अवसर सदुपयोग गर्न सकेनन् । गोलरक्षक सेचेज्नीले पेनाल्टी विफल पार्दै रिबाउन्डमा आएको प्रहारलाई पनि बाहिर पठाए ।

यस समूहमा पहिलो खेलबाट साउदी अरेबियाले ३ तथा पोेल्यान्ड र मेक्सिकोले १-१ अंक जोडेका छन् । अर्जेन्टिनाले अंक जोडेको छैन । आजै अर्जेन्टिना र मेक्सिको पनि भिड्नेछन् ।