कतार (हाम्रो खेलकुद) – फिफा विश्वकप कतार २०२२ अन्तर्गत समूह सी को खेलमा पोल्यान्डले साउदी अरेबियालाई पराजित गरेको छ ।

एजुकेसन सिटी रंगशालामा शनिबार पोल्यान्डले दुवै हाफमा १-१ गोल गर्दै २-० को जित दर्ता गर्यो । पोल्यान्डको जितमा पिटर जिलेन्स्की र रोबर्ट लेवान्डोस्कीले १-१ गोल गरे । पहिलो हाफको इन्ज्युरी समयमा पेनाल्टी चुकाउनु साउदीका लागि महँगो सावित भयो । खेलमा तुलनात्मक रूपमा बढी आक्रमण गरेपनि अवसर सदुपयोग गर्न नसक्दा साउदी पराजित हुन पुग्यो ।

खेलको १३ अ‍ौं मिनेटमा साउदीको अग्रतासामु पोल्यान्डका गोलरक्षक वजसिएक सेचेज्नी बाधक बने । मोहमद कानोले पेनाल्टी क्षेत्र भित्रबाट पहिलो टचमै गरेको शक्तिशाली प्रहार सेचेज्नीले उत्कृष्ट बचाउ गरे ।

खेलको ४० अ‍ौं मिनेटमा पोल्यान्डले पिटर जिलेन्स्कीको गोलमा अग्रता लियो । रोबर्ट लेवान्डस्कीले पेनाल्टी क्षेत्र भित्रबाट दिएको पासलाई जिलेन्स्कीले गोल गरेका थिए । गोलरक्षक बाहिर निस्केको अवस्थामा उनलाई बिट गर्दै जिलेन्स्कीलाई पास दिएका थिए ।

४४ अ‍ौं मिनेटमा साउदीले पेनाल्टीमार्फत खेलमा फर्कने अवसर पायो । भिडियो एसिसेन्ट रेफ्रीले अल शेहरीलाई पेनाल्टी क्षेत्र भित्र लडाएको फलमा पेनाल्टी दिएका थिए । तर साउदीका लागि सलेम अल दोसारीले पेनाल्टी चुकाएछि रिबाउन्डमा मोहमद अल्बुरेकले अवसर सदुपयोग गर्न सकेनन् । गोलरक्षक सेचेज्नीले पेनाल्टी विफल पार्दै रिबाउन्डमा आएको प्रहारलाई पनि बाहिर पठाए ।

दोस्रो हाफमा पनि साउदीले पहिलो हाफझैं आक्रामक दबाब कायम राख्यो ‌‌। ५५ अ‍ौं मिनेटमा टोलीले अवसर पनि पाएको थियो तर पुन: सेचेज्नी बाधक बने । पेनाल्टी क्षेत्र भित्र दुवै टोलीको खेलाडीबीच भिडभाडमा प्रहार हुँदा सेचेज्नीले कठिन बचाउ गरे । त्यसको केहिबेरमा नै साउदीले एक मिनेटको अन्तरमा दुई अवसर सदुपयोग गर्न सकेन ।

६३ अ‍ौं मिनेटमा पोल्यान्डका अर्काडियुस्ज मिलिकको हेडर क्रसबारमा लागेर फर्कियो । प्रेम्स्ला फ्रान्कोस्कीको क्रसमा ६ यार्ड बक्सनजिक अनमार्क रहेका मिलिकको हेडर गोलरक्षकले बचाउन नसकेपनि बारमा लागेर फर्केको थियो । लगत्तै अर्को आक्रमणमा कप्तान रोबर्ट लेवान्डोस्कीको प्रहार पनि पोस्टमा लागेर फर्कियो ।

७८ अ‍ौं मिनेटमा साउदी खेल बराबरी गर्नबाट केहि इन्चले चुक्यो । अब्दुलेला अलमाल्कीले पेनाल्टी क्षेत्र भित्रबाट गरेको प्रहार गोलरक्षक सेचेज्नी कटेर पोस्टनजिकबाट बाहिरियो ।

एकातर्फ गोल गर्न चुकेका अलमाल्की अर्कोतर्फ पोल्यान्डको गोलमा खलनायक बने । पेनाल्टी क्षेत्र अघि लेवान्डोस्कीले उनैबाट बल खोसेर वन भर्सेस वनको अवस्थामा गोल गर्दै अग्रता दोब्बर पारे । उनले विश्वकपमा पहिलो गोल गर्ने क्रममा संयमित फिनिस गरे ।

९० अ‍ौं मिनेटमा लेवान्डोस्की दोस्रो गोलनजिक पुगेका थिए । एकल प्रयासमा डिफेन्डरलाई बिट गर्दै वन भर्सेस वनमा गोलरक्षक पार गरेका उनको फितलो प्रहार सुल्तान अलघानामले गोललाइनबाट क्लियर गरिदिए ।

यस नतिजासँगै समूहको नकआउट चरणमा पुग्ने समिकरण थप रोमान्चक बनेको छ । हालसम्म पोल्यान्डले ४, साउदी अरेबियाले ३ र मेक्सिकोले १ अंक जोडेका छन् । अर्जेन्टिनाले अंक जोडेको छैन । आजै अर्जेन्टिना र मेक्सिको पनि भिड्नेछन् ।