कतार (हाम्रो खेलकुद) – सन् १९९८ मा फिफा विश्वकप उपाधि जितेको फ्रान्स सन् २००२ मा समूह चरणमै बाहिरियो । फ्रान्सबाट सुरु भएको साविक विजेताको खराब प्रदर्शन सन् २०१८ को रुस विश्वकपसम्म पनि जारी रहयो । यसपटक फ्रान्स आफैंले कतार विश्वकपमा उक्त श्राप तोडेको छ ।

फ्रान्सले शनिबार समूहको दोस्रो खेलमा डेनमार्कलाई पराजित गर्दै अन्तिम १६ मा स्थान पक्का गरेको छ । पहिलो खेलमा अष्ट्रेलियालाई ४-१ ले हराएको फ्रान्सका लागि दोस्रो खेलमा किलीयन एमबाप्पे नायक बने । उनकै दुई गोलमा फ्रान्सले २-१ को जित दर्ता गर्यो । उक्त जितसँगै फ्रान्स कतारमा जारी विश्वकपको नकआउट चरणमा पुग्ने पहिलो टोली बन्यो ।

सन् २०१८ को उपाधि विजेतालाई यसपटक विश्वकपअघि चोटले निकै सताएको थियो । विश्वकपको लागि अन्तिम टोली घोषणा गर्नुअघि नै फ्रान्सले मिडफिल्डरद्वय पल पोग्बा र एनगोलो कान्टे, गोलरक्षक माइक माइग्नान लगायत खेलाडी गुमाएको थियो । विश्वकपका लागि टोली जम्मा भइसकेपछि प्रशिक्षणकै क्रममा टोलीले आक्रमणमा प्रभावशाली खेलाडी क्रिस्टोफर एनकुन्कुको साथ पनि गुमायो । त्यसको केहि दिनपछि यस वर्षका ब्यालोन डी’ओर विजेता करीम बेन्जेमा पनि चोटको कारण बाहिरीए । तर त्यसले फ्रान्सलाई असर गरेन ।

फ्रान्स आफैं सन् २००२ मा उपाधि रक्षामा उत्रदा समूहको पुछारमा रहेर बाहिरिएको थियो । फ्रान्सले त्यसबेला पहिलो खेलमा सेनेगलसँग १-० को हार बेहोरेको थियो । दोस्रो खेलमा उरुग्वेसँग गोलरहित बराबरीमा रोकिएको फ्रान्स तेस्रो खेलमा डेनमार्कसँग २-० ले पराजित हुँदै समूह चरणबाट बिदा भएको थियो ।

सन् २००२ को विजेता ब्राजिलले सन् २००६ मा समूह चरण पार त गर्यो, तर क्वाटरफाइनलमा टोली फ्रान्ससँग १-० ले पराजित हुँदै बाहिरियो । सन् २००६ को विजेता इटाली भने सन् २०१० मा समूह चरणको पुछारमा अड्किएर बाहिरियो । पहिलो खेलमा पाराग्वेसँग १-१ को बराबरीमा रोकिएको इटाली दोस्रो खेलमा न्युजिल्यान्डसँग पनि १-१ को बराबरी खेल्दै अंक बाँड्न बाध्य भयो । त्यसपछि अन्तिम खेलमा स्लोभाकियाले ३-२ ले हराएपछि इटाली निकै कमजोर समूहको पुछारमा रहँदै बाहिरियो ।

सन् २०१० को उपाधि जितेको स्पेनले सन् २०१४ मा समूह चरण पार गर्न सकेन । पहिलो खेलमै नेदरल्यान्ड्ससँग ५-१ ले पराजित स्पेन दोस्रो खेलमा चिलीसँग २-० ले हार बेहोर्दै बाहिरियो । अन्तिम खेलमा अष्ट्रेलियालाई ३-० ले पराजित गर्दै स्पेनले सान्त्वना जित हासिल गर्यो ।

सन् २०१८ मा साविक विजेता जर्मनीको पनि उस्तै हालत भयो । जर्मनी समूहको पुछारमा रहेर बाहिरियो । मेक्सिकोसँग १-० को हार बेहोर्दै सुरु भएको जर्मनीले दोस्रो खेलमा स्विडेनलाई हरायो । इन्ज्युरी समयमा टोनी क्रुसको गोलमा जर्मनी २-१ ले विजयी भएको थियो । तर अन्तिम खेलमा दक्षिण कोरियाले २-० ले हराएपछि जर्मनीको यात्रा समूह चरणमा सिमित भएको थियो ।

फ्रान्सका प्रशिक्षक डीडीएर डेस्च्याम्प्सले आफ्नो टोलीलाई त्यस्तो कुनै दबाब नरहेको बताए । ‘ तथ्यांक भनेको खेलेपछि बन्ने हो । मलाई हाम्रो टोलीमा विश्वास छ । पहिला के भयो भन्नेले हामीलाई असर गर्दैन । हाम्रो टोलीको बलियो पक्ष थाहा छ र हामी जित्नेमा विश्वस्त छौं,’ उनले भने ।