कतार (हाम्रो खेलकुद) – फिफा विश्वकप कतार २०२२ अन्तर्गत समूह बी मा दोस्रो चरणको खेल शनिबार सम्पन्न भयो । पहिलो चरणमा जित दर्ता गर्न नसकेका अर्जेन्टिना र पोल्यान्ड विजयी भएसँगै यस समूहको नकआउट चरण पुग्ने समीकरण निकै रोमान्चक बनेको छ ।
दुई खेलको समाप्तिपछि पोल्यान्ड ४ अंक जोड्दै शीर्षस्थानमा छ । अर्जेन्टीना र साउदी अरेबिया ३ अंकसाथ क्रमश: दोस्रो र तेस्रोमा छन् । अर्जेन्टिना र साउदीको समान अंक भएपनि आजको २ गोलको कारण अर्जेन्टिना अघि छ । मेक्सिकोले १ अंक जोडेको छ । सबै टोलीको अघि बढ्ने सम्भावना रहेको छ ।
अन्तिम चरणको खेलमा अब अर्जेन्टिनाले पोल्यान्डसँग खेल्नेछ । त्यस्तै मेक्सिकोले साउदी अरेबियाको सामना गर्नेछ । दुवै खेल मंसिर १३ गते मध्यरातमा हुनेछ । समूहको अन्तिम खेल एकै समयमा हुने कारण पनि समीकरणबारे दुवै टोली मैदानमा रहँदा थाहा हुनेछ ।
अर्जेन्टिनालाई अघि बढ्ने समीकरण :
अर्जेन्टिनाले अब अन्तिम खेलमा जित हासिल गरे समूहबाट नकआउट चरण प्रवेश गर्नेछ । समूह विजेता वा उपविजेता बन्ने समूहको अर्को खेलको नतिजाले टुंगो लाग्नेछ । यदि अर्जेन्टिना जितेर साउदी बराबरी वा हार बेहोरे अर्जेन्टिना समूह विजेता बन्नेछ । अर्जेन्टिना र साउदी दुवैले जित हासिल गरे गोल अन्तरले समूह विजेता र उपविजेता निर्णय हुनेछ ।
अर्जेन्टिना र पोल्यान्डको खेल बराबरीमा सकिएको अवस्थामा भने अर्जेन्टिना अघि बढ्न मेक्सिकोले जित वा बराबरी नतिजा निकाल्नुपर्नेछ । अर्जेन्टिना र पोल्यान्ड बराबरीमा रोकिएर साउदी र मेक्सिको पनि बराबरी भए अर्जेन्टिना गोल अन्तरमा अघि बढ्नेछ । त्यस्तै अर्जेन्टिना बराबरी खेलेर साउदी जितेको अवस्थामा अर्जेन्टिनाको विश्वकप यात्रा समाप्त हुनेछ ।
*यसअघि समूहमा अर्जेन्टिना दोस्रो हुनुपर्नेमा अन्यथा पर्न गएकोमा क्षमाप्रार्थी छौं – सम्पादक
