कतार (हाम्रो खेलकुद) – अर्जेन्टिनी कप्तान लिओनेल मेस्सी फिफा विश्वकप कतार २०२२ अन्तर्गत मेक्सिकोविरुद्ध जितमा प्लेयर अफ द म्याच चुनिएका छन् ।

लुसेल रंगशालामा मेस्सीले एक गोल र एक असिस्टको योगदान दिएपछि अर्जेन्टिनाले २-० को जित दर्ता गरेको थियो । पहिलो खेलमा साउदी अरेबियासँग पराजित भएपछि निकै आलोचित भएका मेस्सीले दोस्रो खेलमा सानदार प्रदर्शन गरे ।

अर्जेन्टिनाका लागि खेलको ६४ औं मिनेटमा मेस्सीले सुरुवाती गोल गरेका थिए । पेनाल्टी क्षेत्र बाहिरबाट मेस्सीले गरेको प्रहार डिफेन्डरलाई डिफ्लेक्ट हुँदै गोलमा परिणत भएको थियो । गोलरक्षक गोलेर्मे ओचोआले सहि दिशामा डाइभ दिएपनि उनी बलसम्म पुग्न सकेनन् ।

मेक्सिको बराबरी गोलको खोजीमा लगातार आक्रमण गरिरहँदा अर्जेन्टिनाले ८७ औं मिनेटमा दोस्रो गोल थप्यो । बेन्चबाट मैदान पस्दै मिडफिल्ड चलायमान बनाएका एन्जो फर्नान्डेजले सुन्दर गोल गर्दै अर्जेन्टिनाको जित पक्का गरे । उनले मेस्सीको पासलाई पेनाल्टी क्षेत्रभित्र लिएपछि डिफेन्डरलाई छक्याएर गरेको प्रहारलाई गोलरक्षक ओचोआले बचाउने कुनै अवसर पाएनन् ।

त्यसअघि समूह सी मै आज भएको खेलमा पोल्यान्डले साउदी अरेबियालाई पराजित गरेको थियो । पोल्यान्डका कप्तान रोबर्ट लेवान्डोस्कीले एक गोल र एक असिस्टको योगदान दिएपछि पोल्यान्ड २-० ले विजयी भएको थियो ।

यस नतिजासँगै अर्जेन्टिना समूह सी मा ३ अंकसहित दोस्रो स्थानमा छ । पोल्यान्ड ४ अंक जोड्दै शीर्षस्थानमा रहँदा साउदी अरेबिया ३ अंक जोड्दै तेस्रो छ । अर्जेन्टिना र साउदीको समान अंक भएपनि गोल अन्तरमा अर्जेन्टिना अघि छ ।

अर्जेन्टिनाले अब अन्तिम खेलमा जित हासिल गरे समूहबाट नकआउट चरण प्रवेश गर्नेछ । समूह विजेता वा उपविजेता बन्ने समूहको अर्को खेलको नतिजाले टुंगो लाग्नेछ । मेक्सिको र साउदी अरेबियाको खेलको नतिजाले नकआउट पुग्ने र समूह स्थान निर्धारणमा प्रत्यक्ष असर पर्नेछ ।

*यसअघि समूहमा अर्जेन्टिना दोस्रो हुनुपर्नेमा अन्यथा पर्न गएकोमा क्षमाप्रार्थी छौं – सम्पादक