कतार (हाम्रो खेलकुद) – फिफा विश्वकप कतार २०२२ अन्तर्गत समूह एच अन्तर्गत क्यामरुन र सर्बियाको खेल ३-३ को बराबरीमा सकियो । खेल सुरु हुनुअघि क्यामरुनले आफ्नो मुख्य गोलरक्षक आन्द्रे ओनानालाई टोलीबाहिर राख्यो । प्रशिक्षक रिगोबेर्ट संगका अनुसार ओनानालाई अनुशासन नदेखाएको कारण टोलीबाट बाहिर राखिएको हो ।

इटालियन क्लब इन्टर मिलानका गोलरक्षक ओनानाले पहिलो खेलमा सुरुवात गरेका थिए । स्विटजरल्यान्डविरुद्ध १-० को हारमा उनले पूरै ९० मिनेट मैदानमा बिताएका थिए । तर सर्बियाविरुद्ध भने उनलाई खेल सुरु हुनुअघि टोलीबाट बाहिर राखियो । खेलाडी सुचिमा पनि उनी बेन्चमा नरहेर अनुपस्थित देखाइएको थियो ।

खेलपछि बोल्दै प्रशिक्षक संगले टोलीको अनुशासन नमानेको कारण उनलाई बाहिर राखिएको जानकारी दिए । ‘ओनानालाई टिमबाट बाहिर राख्ने मेरो निर्णय हो । यसको जिम्मेवारी पनि म लिन्छु । मैले उनको खेल्ने क्षमताबारे प्रश्न गरको छैन । उनी युरोपको शीर्ष क्लबमा खेलिरहेका छन् । उनी राम्रा खेलाडी हुन् । तर टोलीको माग पनि हुन्छन् । हामीले अहिले नै उनीबारे निर्णय लिइसकेका छैनौं । यो निर्णय लिनुअघि उनको धारणा पनि बुझ्न जरुरी छ । हाललाई भने हामी छलफलपछि मात्र निर्णय गर्नेछौं,’ संगले भने ।

‘गोलरक्षकको पोजिसन महत्त्वपूर्ण छ । हामी कठिन प्रतियोगिता खेलिरहेका छौं । तर कसरि खेल्ने भन्ने र के गर्नुपर्छ भन्ने प्रशिक्षकलाई थाहा हुन्छ । आजको स्थितिमा मैले व्यक्ति भन्दापनि टिमको बारेमा सोच्नुपर्छ । हामीले त्यसो भन्दा आन्द्रेले टोली छोड्ने निर्णय लिए । हामीले पनि उनको निर्णय मान्यौं ।’

‘हामी एकसाथ यो प्रतियोगिता खेल्न आएका हौं । टिममा एकता, अनुशासन र सम्मान हुनुपर्छ । उनी राम्रो गोलरक्षक हुन् । तर हामीसँग अन्य खेलाडी पनि छन् । टोलीमा २६ खेलाडी छन् र अरु सबै तयार थिए । आज उनको स्थानमा खेलेका एपासी पनि राम्रो गोलरक्षक हुन् । उनले पनि राम्रो नै खेले ।’

‘हामी टिमको रुपमा रहेका छौं । टोलीमा आवश्यक परेको बेलामा माग अनुसारको जिम्मेवारी लिनुपर्छ । कुनै एक खेलाडीको लागि हाम्रो टोलीले आफ्नो स्थान परिवर्तन गर्ने होइन । खेलाडीले अनुशासन देखाउनुपर्छ । सम्मान गर्नुपर्छ । तर उनको फरक विचार थियो ।’

प्रशिक्षक संगले पहिलो खेलको तुलनामा सर्बियाविरुद्ध राम्रो प्रदर्शन गरेको बताए । ‘पहिलो खेलमा आजजस्तो खेल्न सकेनौं । तर आजको खेलमा सबैले डटेर खेले । हाम्रो चिनारी नै त्यहि हो, जुन पहिलो खेलमा देखिएको थिएन । अग्रता लिएपनि पहिलो हाफको अन्त्यतिर पछि पर्यौं । तर टोलीले खेलमा फर्कन जानेको छ भन्ने देखाएको छ,’ उनले थपे ।

संगका अनुसार ओनानाको बारेमा टोलीले धेरै सोच्ने छैन । ‘हामीले अब ब्राजिलविरुद्ध खेलको लागि ध्यान दिनेछौं । ओनानाको बारेमा धेरै सोच्नुपर्ने छैन । उनले टोलीको अनुशासन मान्छन् र सम्मान गर्छन् भने छलफल गर्नेछौं । के हुन्छ भन्नेमा उनको के भनाइ रहन्छ भन्ने पनि महत्त्वपूर्ण हुनेछ । हामी २६ खेलाडी छौं र अन्यले आफ्नो जिम्मेवारी बुझेका छन्,’ संगले टुंग्याए ।

यस समूहमा ब्राजिल र स्विटजरल्यान्डको ३-३ अंक छ । सर्बिया र क्यामरुनले बराबरीका साथ १-१ अंक बाँड्दै खाता खोलेका छन् । आजै रातको ९:४५ बजे हुने खेलमा ब्राजिलले स्विटजरल्यान्डको सामना गर्दैछ । अन्तिम चरणको खेलमा ब्राजिल र क्यामरुन तथा स्विटजरल्यान्ड र सर्बिया भिड्नेछन् ।