दिपेश तिमल्सिना
सिलिगुढी (भारत)– नेपालले अघिल्ला संस्करणमा जस्तै चौथो महिला साफ च्याम्पियनसिप फुटबलमा पनि दमदार सुरुआत गरेको छ ।
कञ्चनजंगा रंगशालामा सोमबार भएको खेलमा साबित्रा भण्डारीको दोहोरो ह्याट्रिकसँगै नेपालले भुटानलाई ८–० ले हराउँदै च्याम्पियनसिपमा बलियो दाबेदारी प्रस्तुत गरेको छ । भुटानविरुद्ध नेपालले अहिले सम्मका सबै सात अन्तर्राष्ट्रिय खेल जितेको छ । साफ च्याम्पियनसिपमा हरेक पटक उपविजेतामा चित्त बुझाउँदै आएको नेपाल यसपटक भारतको चुनौति पार गर्न सक्ला ? त्यसको लागि अझै केही दिनमा बन्ने समिकरण सम्म कुर्नु पर्ने हुन्छ ।
नेपालले सफल इतिहासलाई निरन्तरता दिदा खेलको सबैभन्दा केन्द्रमा रहिन् साबित्रा । उनी खेल भर छाइरहिन् । २२ मिनेट भित्रै पहिलो ह्याट्रिक पुरा गरेकी साबित्राले टोलीका ८ मध्ये ६ गोल गरेकी थिइन् । सावित्राले ५,९,२३, ३५,७२ र ७७ मिनेटमा गोल गरेर डबल ह्याट्रिक गरिन् । शर्मिला थापा र कृष्ण खत्री समान १ गोल गरे ।
विपक्षी रक्षापक्तिलाइ विट गर्दै सावित्राले वान भर्सेस वानमा पहिलो गोल गरेकी थिइन् । नवौं मिनेटमा शर्मिलाको पासमा उनले अर्को गोल थपिन् । २३ औंं मिनेटमा कप्तान रेणुका नगरकोटीले मिलाइएको पासलाई सावित्राले गोल गर्दै ह्याट्रिक पुरा गरिन् । ३५ औं मिनेटमा सावित्राले फिल्क हेडमार्फत गोल गरिन् । ७२ औं मिनेटमा विपक्षी गोलकिपर बिट भएको अवस्थामा सावित्राको प्रहार गोलमा परिणत भएको थियो ।
७७ औं मिनेटमा दीपा अधिकारको कर्नरमा आएको बल विपक्षी गोलकिपरले समाउन खोज्दा फुत्केपछि सावित्राले गोल गर्दै दोहोरो ह्याट्रिक पुगरा गरेकी थिइन् । ९० औं मिनेटमा कृष्णले दिपाको क्रसमा गोल गरिन् । सावित्राले पहिलो ह्याट्रिक गरेको तीन मिनेटपछि शर्मिलाले गोल गरेका थिए ।
शर्मिलाले सावित्राकै क्रसमा गोल गरेकी हुन् । भुटानले ९० मिनेटमा दुई पटक मात्र नेपालको पोष्ट नजिक बल लगेको थियो । नेपाली टोलीका प्रशिक्षक कुमार थापाले टोलीले उच्च प्रदर्शन गरेको बताए । भुटानका प्रशिक्षक सुंग जि यालीले नेपाल बलियो टिम भएको उल्लेख गर्दै आफ्नो टोलीमा एक जना बाहेक सबै खेलाडी २० वर्ष कम रहेको बताए ।
नेपालले समूह चरणको अर्को खेल बुधबार माल्दिभ्ससँग खेल्नेछ । नेपाल रहेको समूह एमा श्रीलंका पनि छ ।
