सुबास हुमागाईं, कतार

फिफा विश्वकप कतार २०२२ अन्तर्गत समूह एच को खेलमा घानाले दक्षिण कोरियामाथि रोमान्चक जित दर्ता गरेको छ । एजुकेसन सिटी रंगशालामा सोमबार घानाले ३-२ को जित हासिल गरेको हो ।

पहिलो हाफमा नै दुई गोलको अग्रता लिएको घानाले दोस्रो हाफमा भने राम्रो सुरुवात गर्न सकेन । कोरियाले पहिलो हाफमा पाएको अवसर सदुपयोग नगर्दा घानाले काउन्टर अट्याक र सेट पिसमा गोल गरेको थियो ।

दोस्रो हाफमा भने दक्षिण कोरियाले विंग प्लेमै ध्यान दिँदै ३ मिनेटको अन्तरमा २ गोल गर्दै बराबरी गरेको थियो । तर घानाले पुन: कोरियाली डिफेन्सको कमजोरीको फाइदा उठाउँदै अग्रता लियो । अन्त्यतिर घानाका गोलरक्षकले सुन्दर बचाउ गर्दै टोलीको जित पक्का गरे । पहिलो खेलमा पोर्चुगलसँग पराजित घानाको यो पहिलो जित हो ।

खेलको २४ औं मिनेटमा मोहमद सालिसुले गोल गर्दै घानालाई सुरुवाती अग्रता दिलाए । उनले ६ यार्ड बक्स भित्र क्लियर हुन नसकेको फ्रिकिकलाई गोलमा परिणत गरे । लगत्तै अर्कोतर्फ सनको प्रहारले घानाको डिफेन्स लाइन नै पार गर्न सकेन ।

३४ औं मिनेटमा घानाले अग्रता दोब्बर पार्यो । जोर्डन आयुको लामो पासमा मोहमद कुडुसले गोल गरे । फार पोस्टमा हेडरमार्फत गोल गर्दै उनले घानालाई २-० ले अघि बढाए ।

५३ औं मिनेटमा चो ग्युसुङको हेडरमा घानाका गोलरक्षक लरेन्स एटी जिगीले उत्कृष्ट बचाउ गरे । तर ग्युसुङले तीन मिनेटको अन्तरमा दुई हेडर गोल गर्दै कोरियालाई बराबरीमा ल्याए ।

५८ औं मिनेटमा कांग इन लीको क्रसमा उनले डाइभ गर्दै हेडर मार्फत गोल गरे । तीन मिनेटपछि नै ग्युसुङले कोरियालाई बराबरीमा ल्याए । जिन सु किमको क्रसमा उनले घानाका तीन डिफेन्डरको पछाडीबाट उत्कृष्ट जम्प हेडरमार्फत बराबरी गोल फर्काए ।

६८ औं मिनेटमा कुडुसले व्यक्तिगत दोस्रो गोल गर्दै घानालाई पुन: अग्रता दिलाए । गिडेओन मेन्साहले बायाँ विंगबाट दिएको क्रसमा इनाकी विलियम्स ६ यार्ड बक्सनजिक प्रहार गर्नबाट चुके । तर फार पोस्टमा अनमार्क रहेका कुडुसले बल नियन्त्रणमा लिँदै सुन्दर फिनिस गरे ।

७५ औं मिनेटमा गोलरक्षक जिगीले कांग इन लीको फ्रिकीकमा उत्कृष्ट बचाउ गर्दै घानाको अग्रता कायम राखे । लीले झन्डै २५ यार्ड टाढाबाट प्रहार गरेको फ्रिकिकलाई उनले बायाँतर्फ डाइभ दिँदै विफल पारेका थिए । इन्ज्युरी समयको दोस्रो मिनेटमा जिगीले पुन: एकपटक ग्युसुङको शक्तिशाली प्रहारलाई विफल पार्दै अग्रता जोगाए ।

यस जितसँगै घाना ३ अंक जोड्न सफल भएको छ । यस समूहमा पोर्चुगलको ३ अंक तथा उरुग्वे र दक्षिण कोरियाको १-१ अंक छ । आज मध्यरातमा पोर्चुगल र उरुग्वेबीच खेल हुनेछ । अन्तिम चरणको खेलमा घाना र उरुग्वे तथा दक्षिण कोरिया र पोर्चुगल भिड्नेछन् ।