कतार (हाम्रो खेलकुद) – फिफा विश्वकप कतार २०२२ अन्तर्गत सोमबार राती पोर्चुगलले उरुग्वेलाई पराजित गर्दा मिडफिल्डर ब्रुनो फर्नान्डेस दुई गोल गर्दै प्लेयर अफ द म्याच चुनिए ‌।

पोर्चुगल २-० ले विजयी हुँदा ब्रुनोले उच्च प्रदर्शन गरेका थिए । उनी ह्याट्रिक नजिक पुगेपनि पोस्ट बाधक बनेको थियो । पहिलो खेलमा पनि निर्णायक प्रदर्शन गरेका उनी दोस्रो खेलमा भने प्लेयर अफ द म्याच चुनिए । तर खेलमा पहिलो गोललाई लिएर भने निकै चर्चा भयो ।

दोस्रो हाफको ५४ अ‍ौं मिनेटमा ब्रुनोको गोलमा पोर्चुगलले अग्रता लिएको थियो ‌‌। ब्रुनोले पेनाल्टी क्षेत्र बाहिरबाट रोनाल्डोतर्फ दिएको लामो पास गोलमा परिणत भएको थियो ‌‌। रोनाल्डो हेडरका लागि उफ्रेको अवस्थामा गोलरक्षक सर्जियो रोसेटले बलको दिशा बुझ्न नसक्दा गोल सम्भव भएको थियो । रोनाल्डोले आफू गोल गरेको ठान्दै गोलको खुसियाली मनाएपनि फिफाले रिभ्यु गर्दै ब्रुनोलाई गोल दिएको थियो ।

खेलपछि बोल्दै ब्रुनोले गोल कसले गर्यो भन्ने महत्त्व नहुने बताए । ‘विश्वकपमा खेल्दा कसले गोल गर्यो भन्ने खासै महत्त्व हुँदैन । मलाई त्यसबेला रोनाल्डोले नै गोल गरेजस्तो लागेको थियो । मैले बल उनलाई पास दिएको थिएँ,’ उनले भने ।

‘हिजोको खेलमा कसले गोल गर्यो भन्दापनि हाम्रो जित ठूलो थियो । निकै कठिन प्रतिद्वन्द्वीविरुद्ध हामीले जित निकाल्यौं । यस नतिजाले हामी अपराजित रहेर अघि बढ्न सक्छौं । समूहको शीर्षस्थानमा रहनु मुख्य लक्ष्य हो ।’

इन्ज्युरी समयको पहिलो मिनेटमा पोर्चुगलका लागि ब्रुनोले पेनाल्टीमा दोस्रो गोल गरे । भिडियो एसिसेन्ट रेफ्रीले उरुग्वेको बक्सभित्र ह्यान्ड भएको निर्णय लिएपछि प्राप्त पेनाल्टीमा ब्रुनो गोल गर्न सफल भएका थिए ।

इन्ज्युरी समयको अन्त्यतिर ब्रुनोको ह्याट्रिक प्रयासमा गोलरक्षक र पोस्ट बाधक बने । उनको पहिलो प्रहार गोलरक्षक रोसेटले विफल पारे । लगत्तै पेनाल्टी क्षेत्र बाहिरबाट गरेको प्रहार पोस्टमा लाग्दै बाहिरियो ।

खेलपछि बोल्दै प्रशिक्षक फर्नान्डो सान्तोसले पनि आफूलाई जसले गोल गरेपनि मतलब नहुने बताए । ‘हाम्रो टिमले राम्रो प्रदर्शन गर्यो । लगातार जित निकाल्दै अघि बढेका छौं । अबको ध्यान अर्को खेलमा हुनेछ । गोल कसले गर्यो भन्नेमा मलाई मतलब छैन,’ सान्तोसले हाँस्दै भने ।

प्रशिक्षक सान्तोसले ब्रुनो र रोनाल्डो मात्र नभएर खेलमा अन्य खेलाडीको पनि उत्तिकै योगदान रहेको बताए । ‘ब्रुनो राम्रा खेलाडी हुन् । उनले गोल गरे र हामी जित्यौं । तर खेलमा सबैको योगदान हुन्छ । गोलरक्षक कोस्टाले दुई उत्कृष्ट बचाउ गरे, उनको पनि महत्त्व छ । सबैले एकजुट भएर खेलेको हो,’ उनले थपे ।

पोर्चुगल समूह चरणबाट पार हुने पक्का भइसकेको छ । अन्तिम खेलमा दक्षिण कोरियाका लागि कस्तो टोली छनोट हुन्छ भन्ने प्रश्नमा सान्तोसले बलियो टोली नै उतार्ने बताए । ‘हामी अर्को चरणमा पुगेका छौं तर अझैपनि शीर्षस्थान पक्का भएको छैन । हामी शीर्षस्थानमा नै रहन चाहन्छौं र त्यसै अनुसार अर्को खेलको लागि तयारी हुनेछ । एक दुई खेलाडी परिवर्तन गर्ने सम्भावना हुन्छ तर दोस्रो रोजाइ भन्ने हुँदैन,’ उनले भने ।

यस नतिजासँगै पोर्चुगल समूहको शीर्ष स्थानमा उक्लिएको छ ‌। लगातार दोस्रो जितसँगै ६ अंक जोडेको पोर्चुगल नकआउट चरणमा प्रवेश गरेको छ । घानाको ३ अंक छ भने उरुग्वे र दक्षिण कोरियाको १-१ अंक छ । अन्तिम खेलमा पोर्चुगलले दक्षिण कोरिया र घानाले उरुग्वेको सामना गर्नेछ ।