कतार (हाम्रो खेलकुद) – फिफा विश्वकप कतार २०२२ अन्तर्गत समूह चरणको अन्तिम खेलमा साविक विजेता फ्रान्सलाई पराजित गरेपनि ट्युनिसिया नकआउट चरणमा पुग्न सकेन ।

समूह डीको अन्तिम खेलमा ट्युनिसियाले फ्रान्सलाई १-० ले पराजित गरेको थियो । समूहको अर्को खेलमा अष्ट्रेलियाले डेनमार्कमाथि १-० को जित हासिल गर्दा ट्युनिसिया समूह चरणबाट बाहिरिएको हो । फ्रान्स भने अन्तिम खेलमा हार बेहोरेपनि शीर्ष स्थानमा रहेर अन्तिम १६ मा स्थान बनाउन सफल रह्यो ।

फ्रान्स र अष्ट्रेलियाले ३ खेलमा २ जित र १ हारसहित ६ अंक जोडे । फ्रान्स गोल अन्तरमा अघि रहेर समूह विजेता बन्यो । ट्युनिसिया ३ खेलमा ४ अंक जोड्दै समूहको तेस्रो स्थानमा सिमित रहेर प्रतियोगिताबाट बाहिरियो । डेनमार्क १ अंकसहित पुछारमा रहयो ।

ट्युनिसियाले पहिलो खेलमा डेनमार्कलाई गोलरहित बराबरीमा रोकेको थियो । दोस्रो खेलमा अष्ट्रेलिया १-० ले विजयी भएपछि अन्तिम खेलमा फ्रान्ससँगको नतिजाले समीकरणमा असर गरेन । यदि अष्ट्रेलिया नजितेको भए ट्युनिसिया समूह उपविजेता हुने थियो ।

नकआउट चरणमा स्थान बनाएको फ्रान्सले आजको खेलमा दोस्रो रोजाइका खेलाडीलाई अवसर दिएको थियो । एजुकेसन सिटी रंगशालामा ट्युनिसियाले यसको फाइदा उठाउँदै पहिलो हाफमा फ्रान्सलाई जम्न दिएन । ट्युनिसियालाई सुरुवातमै भीएआरले गोललाई मान्यता नदिएपछि टोली थप आक्रामक बनेको थियो । फ्रान्सले भने कमजोर प्रदर्शन गर्यो ।

दोस्रो हाफमा ट्युनिसियाले अग्रता लियो । कप्तान वाह्बी खाज्रीले कमजोर डिफेन्स र गोलरक्षकको फाइदा उठाउँदै अग्रता दिलाए । त्यसपछि फ्रान्सले लगातार खेलाडी परिवर्तन गर्दै स्टार खेलाडी उतारेपनि खेल बदल्न सकेन । फ्रान्स हारका बाबजुद समूह विजेता बन्दा ट्युनिसिया जितेर पनि समूहको तेस्रो स्थानमा रहँदै समूह चरणबाट बाहिरियो ।

खेलको नवौं मिनेटमा नै ट्युनिसियाले अग्रता लिएपनि उक्त गोल कायम रहेन । फ्रिकिकमा घान्द्रीले हेडरमार्फत गोल गरेपनि भिडियो असिस्टेन्ट रेफ्रीले उक्त सेट पिसमा अफसाइड भएको देखाएको थियो । २५ औं मिनेटमा फ्रान्सले अग्रता लिने अवसर सदुपयोग गर्न सकेन । युसुफ फोफानाको पासमा किंग्सले कोमानले पेनाल्टी क्षेत्र भित्रबाट गरेको प्रहार पोस्टभन्दा बाहिर गएको थियो ।

दोस्रो हाफको ५८ औं मिनेटमा ट्युनिसियाले फ्रान्सको कमजोर डिफेन्सको फाइदा उठाउँदै अग्रता लियो । मिडफिल्डमा बल खोसेको ट्युनिसियाका लागि कप्तान वाह्बी खाज्रीले बललाई एक्लै अघि बढाउँदै पेनाल्टी क्षेत्र भित्रबाट फिनिस गरे । उनको फितलो प्रहार दोस्रो रोजाइका गोलरक्षक स्टिभ मान्डान्डाले जोगाउन सकेनन् ।

दोस्रो हाफमा गोल खाएपछि फ्रान्सले पहिलो रोजाइका खेलाडीलाई मैदान पठाएको थियो । किलीयन एमबाप्पे, एन्टोइन ग्रिजमन र ओस्मान डेम्बेले मैदान छिरेपनि फ्रान्स गोल फर्काउन असफल रहयो । इन्ज्युरी समयमा ग्रिजमनले गोल गरेपनि भीएआरले त्यसलाई गोलको मान्यता दिएन ।

यता अष्ट्रेलियाले नकआउट चरण प्रवेश गर्ने प्रयासमा रहेको डेनमार्कलाई हराउँदै अन्तिम १६ मा स्थान बनायो । निकै प्रतिस्पर्धात्मक खेलको पहिलो हाफमा डेनमार्कले तुलनात्माक रुपमा बढी अवसर पाएको थियो । तर गोलरक्षक म्याट रायन र डिफेन्डरद्वय काइल रोवल्स र ह्यारी सुटरले डेनिस आक्रमणलाई पोस्टतर्फ जान दिएनन् । काउन्टर अट्याकमा केहि अवसर सिर्जना गरेको अष्ट्रेलियाले दोस्रो हाफमा भने रणनीति परिवर्तन गर्यो ।

मिडफिल्डमा खेलाडी थप्दै विंगमा खेलिरहेका म्याथ्यु लेकीलाई काउन्टर अट्याकमा राख्ने ग्राहम आर्नोल्डको रणनीतिले गोल सम्भव भयो । लेकीले आफ्नो गति र संयमताको प्रयोग गर्दै काउन्टर अट्याकमा अष्ट्रेलियालाई अग्रता दिलाए । त्यसपछि अनुशासित डिफेन्स गर्दै अष्ट्रेलिया जितसम्म पुग्न सफल भयो ।

११ औं मिनेटमा अष्ट्रेलियाका मिलोस डेगेनेकले पेनाल्टी क्षेत्रभित्र उत्कृष्ट ट्याकल गर्दै गोलको खतरा टारे । ६ यार्ड बक्स अगाडि माथिअस जेन्सनले प्रहार गर्न लागेको बल उनले स्लाइड ट्याकल गर्दै विफल पारे । लगत्तै अर्को आक्रमणमा गोलरक्षक तथा कप्तान म्याट रायनले उत्कृष्ट बचाउ गर्दै डेनमार्कलाई अघि बढ्न दिएनन् ।

१९ औं मिनेटमा अष्ट्रेलियाले डेनमार्कको अर्को आक्रमण सफल हुन दिएन । जोआकिम माहलेले पेनाल्टी क्षेत्रको बायाँ भागबाट दुई डिफेन्डर पार गर्दै गरेको लो क्रस गोलरक्षक रायनको खुट्टामा लाग्दै गोल हुनबाट बचेको थियो ।

पहिलो हाफ गोलरहित रहेपछि अष्ट्रेलियाले दोस्रो हाफमा गोल गर्यो । म्याथ्यु लेकीले ६० औं मिनेटमा एकल प्रयासमा सानदार गोल गर्दै अग्रता दिलाए । आफ्नो हाफबाट राइली मक्ग्रीले अफसाइड ट्रयाप बिट गर्दै दिएको पासलाई लेकीले पेनाल्टी क्षेत्रभित्र लगेर गोल गरेका थिए । उनले संयमित रुपमा बल राख्दै दुई डिफेन्डर र गोलरक्षकको चुनौती पार गरेका थिए ।

८८ औं मिनेटमा डेनमार्कका एलेक्जेन्डर बाहको प्रहार पोस्टभन्दा बाहिर जाँदा डेनमार्क बराबरी गोल गर्नबाट चुक्यो । अन्तिम समयमा डेनमार्कले कर्नर पाउँदा गोलरक्षक कास्पर स्माइकल आफैं हेडरका लागि आएका थिए । तर गोल फर्काउन नसक्दा डेनमार्क पुछारमा रहेर बाहिरियो ।