सुबास हुमागाईं, कतार

फिफा विश्वकप कतार २०२२ अन्तर्गत समूह सी बाट अर्जेन्टिना र पोल्यान्ड नकआउट चरणमा प्रवेश गरेका छन् । अर्जेन्टिनाले अन्तिम खेलमा २-० को जित दर्ता गर्दै शीर्षस्थान हासिल गर्दा पोल्यान्ड दोस्रो हुँदै अघि बढ्न सफल रहयो ।

मेक्सिकोले साउदी अरेबियालाई २-१ ले पराजित गरेपनि नकआउट चरणमा स्थान बनाउन सकेन । यस समूहमा अर्जेन्टिना ३ खेलमा २ जित र १ हारसहित ६ अंकका साथ शीर्षस्थानमा रहयो । मेक्सिको र पोल्यान्डले समान ४-४ अंक जोडे । तर पोल्यान्ड (०) को गोलअन्तर मेक्सिको (-१) भन्दा राम्रो हुँदा गोल अन्तरमा पोल्यान्ड अघि रहयो । साउदी अरेबिया ३ अंकसहित पुछारमा रहयो ।

एक समय पहेंलो कार्डमा समूहको दोस्रो र तेस्रो स्थानको छिनोफानो गर्ने अवस्था रहेको थियो । तर इन्ज्युरी समयको अन्त्यतिर मेक्सिकोले गोल खाएपछि पोल्यान्ड त्यहि गोलको सहायताले गोलअन्तरमा अघि रहँदै नकआउट चरणमा स्थान बनाउन सफल रहयो । यदि मेक्सिकोले अन्तिम समय गोल थपेको भए पोल्यान्ड बाहिरिने थियो ।

समूहको अन्तिम खेलमा पोल्यान्डलाई २-० ले हराउँदै अर्जेन्टिना अन्तिम १६ मा स्थान बनाउन सफल रहयो । पहिलो हाफमा कप्तान लिओनेल मेस्सीले पेनाल्टी चुकाउँदा पहिलो हाफको खेल गोलरहित रहेको थियो । अर्जेन्टिनाले बल पोसेसन र आक्रमणमा दबाब कायम गरेपनि अग्रता भने लिन सकेको थिएन । पोल्यान्डका गोलरक्षक वोजसिएक सेचेज्नीले एक पेनाल्टीसहित अर्जेन्टिनाको लगातार आक्रमण विफल पार्दै खेल गोलरहित राखे ।

तर दोस्रो हाफको सुरुवातमै अर्जेन्टिना गोल फर्काएपछि अर्जेन्टिनालाई दबाब रहेन । दोस्रो हाफको मध्यतिर अग्रता दोब्बर भएपछि अर्जेन्टिना सहज जिततर्फ उन्मुख देखिएको थियो ।

सातौं मिनेटमा मेस्सीले पेनाल्टी क्षेत्रबाहिर पोल्यान्डका तीन डिफेन्डर बिट गरेपनि अन्तिम प्रहार फितलो हुन पुग्यो । दशौं मिनेटमा मेस्सीले कठिन एंगलबाट गरेको शक्तिशाली प्रहार गोलरक्षक वोजसिएक सेचेज्नीले बचाए । त्यसपछि अर्जेन्टिनाले लगातार आक्रमण बुनेपनि पोलिस डिफेन्स सजग रहीरह्यो ।

२९ औं मिनेटमा मार्कस अकुनाको प्रहारले पोस्टको दिशा लिन सकेन । ३४ औं मिनेटमा एन्जल डी मारियाको कर्नर प्रहारलाई उनकै क्लब युभेन्टसबाट खेल्दै आएका गोलरक्षक सेचेज्नीले नै बल्लतल्ल बचाए ।

३५ औं मिनेटमा सेचेज्नी अर्जेन्टिनाको अग्रतासामु पुन: बाधक बने । जुलियन अल्भारेजसँग वन भर्सेस वनको अवस्थामा उनले राम्रो बचाउ गरे । लगत्तै अल्भारेजले दिएको क्रस बचाउने प्रयासमा सेचेज्नीको हातले मेस्सीको अनुहारमा लागेको थियो । रेफ्रीले भिडियो असिस्टेन्ट रेफ्रीको सहयता लिँदै अर्जेन्टिनालाई पेनाल्टी दिए ।

तर मेस्सीले उक्त पेनाल्टीमा गोल गर्न सकेनन् । सेचेज्नीले आफ्नो बायाँतर्फ डाइभ दिँदै मेस्सीको पेनाल्टी प्रहार विफल पारे । जारी विश्वकपमा उनको यो दोस्रो पेनाल्टी बचाउ हो । यसअघि उनले साउदी अरेबियाका अल दसारीको पेनाल्टी पनि बचाएका थिए । ४३ औं मिनेटमा अल्भारेजको प्रहारमा पुन: सेचेज्नी बाधक बने ।

पहिलो हाफ गोलरहित रहेपनि दोस्रो हाफको सुरुवातमै अर्जेन्टिनाले अग्रता लियो । अर्जेन्टिनाका लागि एलेक्सिस म्याक आलिस्टरले ४७ औं मिनेटमा गोल गरे । नाहुएल मोलिनाले दायाँ विंगबाट दिएको लो क्रसलाई एलेक्सिसले गरेको प्रहार फितलो थियो । तर उक्त प्रहार दुई डिफेन्डर र गोलरक्षक पार हुँदै गोलमा परिणत भएको थियो ।

६८ औं मिनेटमा जुलियन अल्भारेजले अर्जेन्टिनाको अग्रता दोब्बर पारे । एन्जो फर्नान्डेजले पेनाल्टी क्षेत्र बाहिरबाट दिएको पासलाई अल्भारेजले पेनाल्टी क्षेत्रभित्र डिफेन्डरको दबाबमाझ नियन्त्रण गरे । उनले त्यसपछि गरेको प्रहार गोलरक्षक सेचेज्नीको हातमा लाग्दै गोल भएको थियो ।

७१ औं मिनेटमा अल्भारेजको प्रहारले पोस्टको दिशा लिन सकेन । ८६ औं मिनेटमा लौटारो मार्टिनेजको प्रहारलाई गोलरक्षक सेचेज्नीले विफल पारे ।

त्यस्तै लुसेल रंगशालामा बुधबार २-१ को जित दर्ता गरेपनि गोलअन्तरमा पोल्यान्डभन्दा पछि रहेपछि मेक्सिको तेस्रो भयो । खेलको तेस्रो मिनेटमा नै मेक्सिकोले अग्रता लिने अवसर पाएको थियो । एलेक्सिस भेगाले अफसाइड ट्रयाप बिट गर्दै गोलरक्षकसँग वन भर्सेस वनको स्थितिमा प्रहार गर्न पाएका थिए । तर गोलरक्षक मोहमद अलोवाइसले अघि बढ्दै उत्कृष्ट बचाउ गरे । लगत्तै अर्कोतर्फ सालेह अल शेहरीको प्रहार गोलरक्षक गिलेर्मे ओचोआले सहजै बचाए ।

२३ औं मिनेटमा लुइस चाभेजको पेनाल्टी क्षेत्र बाहिरको प्रहारले गोलरक्षक अलोवाइसलाई खस समस्या दिन सकेन । इन्ज्युरी समयमा साउदीका अल शेहरीले पेनाल्टी क्षेत्रभित्र डिफेन्डर बिट गरेपनि अन्तिम प्रहार गर्न पाएनन् ।

दोस्रो हाफको सुरुवातमा मेक्सिकोले लगातार दुई गोल गर्दै खेलमा पकड जमायो । हेनरी मार्टिनले मेक्सिकोका लागि ४८ औं मिनेटमा सुरुवाती अग्रता दिलाए । कर्नरमा सेजार मोन्टेसको फ्लिकलाई मार्टिनले ६ यार्ड बक्स नजिकबाट गोलमा परिणत गरे ।

५२ औं मिनेटमा मेक्सिकोले अग्रता दोब्बर पार्यो । लुइस चाभेजले फ्रिकिकमा दर्शनीय गोल गर्दै मेक्सिकोलाई जिततर्फ उन्मुख गराए । उनले झन्डै ३० यार्ड टाढा प्राप्त फ्रिकिकलाई टप कर्नरमा गोल गरेका थिए ।

६७ औं मिनेटमा हर्भीङ लोजानोको प्रहार गोलरक्षक अलोवाइसले विफल पार्दै खेलमा फर्कने सम्भावना जीवित राखे ।

इन्ज्युरी समयमा साउदीले गोल गरेपछि मेक्सिको गोलअन्तर कम हुन पुगेको थियो । सालेम अल दसारीले गोल गर्दै मेक्सिकोलाई नकआउट चरणनजिक पुग्न दिएनन् ।

समूहको अर्को खेलमा अर्जेन्टिनाले पोल्यान्डलाई २-० ले हराएको थियो । यस समूहमा अर्जेन्टिना ३ खेलमा २ जित र १ हारसहित ६ अंकका साथ शीर्षस्थानमा रहयो । मेक्सिको र पोल्यान्डले समान ४-४ अंक जोडे । तर पोल्यान्ड (०) को गोलअन्तर मेक्सिको (-१) भन्दा राम्रो हुँदा गोल अन्तरमा पोल्यान्ड अघि रहयो । साउदी अरेबिया ३ अंकसहित पुछारमा रहयो ।

यो पनि पढ्नुहोस :

साउदीलाई हराएपनि मेक्सिको नकआउट चरणमा पुगेन

अर्जेन्टिना समूह विजेता बन्दै नकआउट चरणमा