कतार (हाम्रो खेलकुद) – फिफा विश्वकप कतार २०२२ अन्तर्गत समूह एफ को अन्तिम खेल चलिरहेको छ । मोरक्कोले क्यानडाविरुद्ध अग्रता लिँदा बेल्जियम र क्रोएसिया गोलरहित बराबरीमा छन् ।
मोरक्कोले पहिलो हाफमा २-१ को अग्रता लिएको छ । खेलको सुरुवात समयदेखि दबाब बनाएको मोरक्को अग्रतासँगै समूहको शीर्षस्थानमा छ ।
मोरक्कोले खेलको चौथो मिनेटमा नै अग्रता लिएको थियो । क्यानडाका गोलरक्षक मिलान बोर्जानले पेनाल्टी क्षेत्र बाहिर आएर क्लियर गरेको बल हाकिम जिएचले पाएपछि कुनै गल्ती गरेनन् । जिएचले झन्डै २५ यार्ड टाढाबाट सिधै गोल गरेका थिए ।
२३ अौं मिनेटमा मोरक्कोले अग्रता दोब्बर पार्यो । अक्रफ हाकिमीको लामो पासलाई युसुफ एन नेसरीले फिनिस गरे । पहिलो टचमा दुई डिफेन्डरको चुनौती चिर्दै पेनाल्टी क्षेत्र भित्र पसेका उनले दोस्रो टचमा सुन्दर गोल गरे ।
४० अौं मिनेटमा नाएफ अगुएर्डले आत्मघाती गोल गरेपछि क्यानडा खेलमा फर्कियो । साम अडेकुग्बेको क्रस अगुएर्डलाई लाग्दै गोल भएको थियो ।
समूहकै अर्को खेलमा क्रोएसिया र बेल्जियमले गोल गर्न सकेका छैनन् । दुवै टोलीले कम अवसर सिर्जना गर्दा खेल बराबरीमा रोकिएको छ ।
१३ अौं मिनेटमा केभिन डे ब्रुएनको पासमा ड्रिज मर्टेन्सको प्रहार पोस्टभन्दा माथिबाट बाहिरियो । लगत्तै अर्कोतर्फ पेनाल्टी क्षेत्रभित्र यानिक करास्कोले फल गर्दा रेफ्रीले क्रोएसियालाई पेनाल्टी दिए । तर भिडियो एसिसेन्ट रेफ्रीले उक्त मुभका क्रममा अफसाइड भएकाले उक्त गोलले मान्यता पाएन ।
यस समूहमा हाफ टाइमको स्कोर मान्दा मोरक्को र क्रोएसिया अघि बढ्ने समीकरण छ । हाल मोरक्को ७ र क्रोएसियाको ५ अंक छ । बेल्जियमको ४ अंक हुँदा क्यानडा अंकविहिन छ ।
