कतार (हाम्रो खेलकुद) – फिफा विश्वकप कतार २०२२ अन्तर्गत समूह चरणबाट बाहिरीएपछि बेल्जियमका प्रशिक्षक रोबर्टो मार्टिनेजले पद छोडेका छन् ।
समूहको अन्तिम खेलमा क्रोएसियासँग गोलरहित बराबरीमा रोकिएपछि बेल्जियम समूह चरणबाट बाहिरिएको हो । फिफा वरीयताको दोस्रो स्थानमा रहेको बेल्जियमले ३ खेलमा ४ अंक जोड्दै समूहको तेस्रो स्थानमा रहयो । अन्तिम खेलमा क्रोएसियासँग जित हासिल गर्न नसक्दा टोली बाहिरिन पुग्यो । खेलपछि मार्टिनेजले आफू पदमा नरहने जानकारी दिए ।
यस समूहबाट मोरक्को ७ अंक जोड्दै शीर्षस्थानमा रहयो । दोस्रो खेलमा मोरक्कोले नै बेल्जियमलाई २-० ले हराएको थियो । पहिलो खेलमा क्यानडालाई १-० ले पराजित गरेको बेल्जियम अन्तिम खेलमा भने गोलरहित बराबरीमा रोकियो ।
दोस्रो हाफमा बेल्जियमले गोल गर्ने अवसर पटक पटक खेर फालेपछि टोली अघि बढ्न सकेन । पहिलो हाफमा थोरै अवसर सिर्जना गरेको बेल्जियमले दोस्रो हाफमा भने रोमेलु लुकाकुलाई मैदान पठाएको थियो । आक्रमणमा रणनीति अनुसार नै अवसर सिर्जना भयो । तर लुकाकुले तीन सहज अवसरलाई गोलमा परिणत गर्न नसक्दा बेल्जियम बाहिरियो ।
१३ अौं मिनेटमा केभिन डे ब्रुएनको पासमा ड्रिज मर्टेन्सको प्रहार पोस्टभन्दा माथिबाट बाहिरियो । लगत्तै अर्कोतर्फ पेनाल्टी क्षेत्रभित्र यानिक करास्कोले फल गर्दा रेफ्रीले क्रोएसियालाई पेनाल्टी दिए । तर भिडियो एसिसेन्ट रेफ्रीले उक्त मुभका क्रममा अफसाइड भएकाले उक्त गोलले मान्यता पाएन ।
दोस्रो हाफमा बेल्जियमले रोमेलु लुकाकुलाई मैदानमा उतार्यो । ६२ अौं मिनेटमा लुकाकुले पेनाल्टी क्षेत्र भित्रबाट गरेको शक्तिशाली प्रहार पोस्टमा लागेको थियो । उनले ६ यार्ड बक्स नजिकबाट गरेको प्रहार पोस्टको भित्री भागमा लाग्दै थ्रो इनका लागि बाहिरियो ।
लगत्तै लुकाकुले अर्को अवसरको पनि सदुपयोग गर्न सकेनन् । यसपटक डे ब्रुएनको क्रसमा गोलरक्षक बिट भएपनि उनले हेडरलाई पोस्टको दिशा दिन सकेनन् । ८५ अौं मिनेटमा थोमस मुनिएरकै पासमा लुकाकुको प्रहार पोस्टभन्दा थोरैले बाहिरियो । ९० अौं मिनेटमा लुकाकु गोललाइन नजिकबाट गोल गर्न चुक्दा बेल्जियम नकआउट चरणमा पुग्न बन्चित भयो ।
