काठमाडौं (हाम्रो खेलकुद)– सेन्ट जेभियर्स स्कुल, जावलाखेलले फादर एलेन स्टार स्मृति छात्रा आमन्त्रण फुटबल प्रतियोगिताको उपाधि जितेको छ । सोमबार भएको फाइनलमा सेन्ट जेभियर्सले गोदावरीको क्रेसेन्ट एकेडेमी इङलिस स्कुललाई १–० ले हराएको थियो । जेभियर्सका लागि दिलाशा पराजुलीले गोल गरेकी थिइन् ।
फादर एलेन स्टारको स्मृतिमा सेन्ट जेभियर्स गोदावरीले सन् २०११ देखि प्राथमिक तहका छात्राका लागि फुटबल प्रतियोगिता आयोजना गर्दै आएको छ । विजेता उपविजेता टोलीका खेलाडीलाई अखिल नेपाल फुटबल संघ (एन्फा) को महिला समितिकी अध्यक्ष कल्पना पिया श्रेष्ठले पुरस्कृत गरेकी थिइन् ।
अध्यक्ष श्रेष्ठले विद्यालयस्तरका प्रतियोगिताले महिला फुटबल विकासका लागि आधार तयार पार्ने बताइन् । सेन्ट जेभियर्स गोदावरीका प्रिन्सिपल सामुयल सिमिक, सुपेरिअर अरुल सेल्भमले प्रमुख अतिथि अध्यक्ष श्रेष्ठ, रेफ्री माया लामा र राधिका शाक्यलाई मायाको चिनो प्रदान गरेका थिए । एक दिने प्रतियोगितामा ७ टोलीको सहभागिता थियो ।
