एजेन्सी – घानाका मुख्य प्रशिक्षक ओटो एडोले आफ्नो पदबाट राजीनामा दिएका छन् । फिफा विश्वकप कतार २०२२ को समूह चरणबाटै बाहिरिएपछि उनले राजीनामा दिएका हुन् ।

विश्वकप २०२२ मा घानाले समूह ‘एच’ मा तीन खेलमा केवल एक खेलमा मात्रै जित निकाल्न सफल भएको थियो । दक्षिण कोरियालाई ३–२ ले हराएको घानाले पोर्चुगलसँग ३–२ ले तथा उरुग्वेसँग २–० ले पराजित हुँदै समूहमा पुछारमा रह्यो ।

४७ वर्षीय घानाका पुर्व मिडफिल्डर एडोले गत फेब्रुअरीदेखि टोलीको मुख्य प्रशिक्षकमा नियुक्त भएका थिए । तत्कालिन प्रशिक्षक मिलोभान राजेभाकलाई प्रतिस्थापन गर्दै उनी टोलीको मुख्य प्रशिक्षक बनेका थिए । त्यसपछि उनको सम्झौता यसै विश्वकप अर्थात डिसेम्वरसम्म रहेको थियो ।

त्यसअघि उनले सहायक प्रशिक्षकको रुपमा घानाको टोलीमा काम गरेका थिए । उनले जर्मन क्लब बोरुसिया डर्टमन्डमा पनि प्रतिभा प्रशिक्षकको भूमिका निभाएका थिए । त्यसैबाट उनी डर्टमुन्डको सहायक प्रशिक्षक बनेका थिए । लुसियन फाब्रेको बर्खास्तीपछि उनी डर्टमुन्डको अन्तरिम मुख्य प्रशिक्षक बनेका थिए । त्यसबेला उनले जर्मन डिएफवी पोकल जितेका थिए ।

२५ सेप्टेम्वर २०२१ मा उनी घानाको पुरुष फुटबलसँग जोडिएको थियो । जर्मनीको ह्यामवर्गमा जन्मिएका उनले आफ्नो खेल र कोचिङ करियरको अधिकांश समय जर्मनीमा बिताएका छन् । उनको प्रशिक्षणमा घानाले १२ खेल खेल्दा ४ जित, ३ बराबरी र ५ हारको नतिजा निकालेको छ ।

‘मैले सधैं भनेको थिएँ कि यदि हामी विश्वकपका लागि छनोट भयौं भने म विश्व च्याम्पियन भए पनि पछि राजीनामा दिनेछु ।’ उनले भने, ‘मेरो परिवारले हाम्रो भविष्य जर्मनीमै देखेको छ । फुटबल सुन्दर छ, कहिलेकाहीँ यो कुरूप छ । यो आज हाम्रो लागि कुरूप छ । हामीले सिक्नु पर्छ र म विश्वस्त छु कि हामी भविष्यमा यसबाट सिक्ने छौं ।’