कतार (हाम्रो खेलकुद) – फिफा विश्वकप कतार २०२२ मा एसियाका तीन राष्ट्रले नकआउट चरणमा स्थान पक्का गरे । फिफा विश्वकपको २२ औं संस्करण आइपुग्दा एसियाका तीन टोली अन्तिम १६ मा पुगेको यो पहिलो अवसर हो ।
यसअघि सन् २००२ मा जापान र कोरियाले संयुक्त रुपमा आयोजना गरेको विश्वकपमा पनि एसियाका दुई टोली अघि बढेका थिए । त्यसपछि सन् २०१० मा पनि दुई टोलीले अन्तिम १६ मा स्थान बनाएका थिए । यसपटक भने जापान, दक्षिण कोरिया र अष्ट्रेलिया तीन टोलीले समूह चरण पार गरेका छन् ।
यसपटक आयोजक कतारसहित ६ राष्ट्रले विश्वकपमा सहभागिता जनाएका थिए । कतार, इरान र साउदी अरेबिया भने समूह चरणबाट नै बाहिरीए । कतार सुरुवाती दुई खेल हार्दै प्रतियोगिताबाट बाहिरिने पहिलो टोली बनेको थियो । कतारले यसपटक कुनै अंक जोड्न सकेन । इरान र साउदी अरेबियाले १-१ खेल जित हासिल गरेपनि अन्तिम खेलमा आफू अनुकुल नतिजा निकाल्न नसक्दा समूह चरणबाट बाहिरिए ।
जापान, अष्ट्रेलिया र दक्षिण कोरियाले युरोपेली टोलीलाई पराजित गर्दै समूह चरण पार गरेका हुन् । जापानले समूह विजेता बन्ने क्रममा स्पेन र जर्मनीलाई २-१ ले हराएको थियो । दक्षिण कोरियाले युरोपेली टोलीविरुद्ध उच्च लय कायम राख्दै पोर्चुगललाई २-१ ले हरायो । त्यस्तै अष्ट्रेलियाले डेनमार्कलाई १-० ले पराजित गर्दै अन्तिम १६ को यात्रा पक्का गर्यो ।
एसियाले कीर्तिमान राख्दा तीनै अवसरमा कोरिया अन्तिम १६ मा पुगेको छ । सन् २००२ मा कोरिया सेमिफाइनल पुग्नु नै एसियाली राष्ट्रको उत्कृष्ट प्रदर्शन हो । त्यसबेला टोली चौथो भएको थियो । यसबाहेक सन् १९६६ मा उत्तर कोरिया क्वाटरफाइनलमा प्रवेश गर्नु नै एसियाको उत्कृष्ट नतिजा हो ।
हालसम्म एसियाली फुटबल महासंघ (एएफसी) मा सदस्य रहेका ४६ मध्य ३४ राष्ट्रले विश्वकप खेलेका छैनन् । नेपालले हालसम्म ८ पटक विश्वकप छनोटमा प्रतिस्पर्धा गरेको छ ।
