सुबास हुमागाईं, कतार

फिफा विश्वकप कतार २०२२ अन्तर्गत दक्षिण कोरियाविरुद्ध अन्तिम १६ को खेलअघि ब्राजिलका डिफेन्डर थियागो सिल्भाले पछिल्लो खेलमा हार बेहोरेर ब्राजिललाई घाटा नभएको बताए ।

ब्राजिलले समूहको अन्तिम खेलमा क्यामरुनसँग १-० को हार बेहोरेको थियो । इन्ज्युरी समयमा भिन्सेन्ट अबुबकारले गोल गरेपछि ब्राजिल प्रतियोगिताको पहिलो हाफ बेहोर्न पुगेको थियो । खेलको पूर्व सन्ध्यामा बोल्दै चेल्सीबाट व्यावसायिक फुटबल खेल्दै आएका सिल्भाले अन्तिम खेलमा हार बेहोर्नुले टोलीलाई यस खेलका लागि असर नपर्ने बताए ।

‘हामीलाई अन्तिम खेलमा के हुनसक्छ भन्ने थाहा थियो । तर हामीले के हुनसक्छ भन्ने जोखिम लिएर नै यो निर्णय लिएका थियौं । क्यामरुनले यदि सुरुमै दुई गोल गरेको भए स्थिति फरक हुन्थो । अथवा अर्को खेलमा फरक नतिजा आएको भए हामीले पनि अर्को रणनीति लिनुपर्थ्यो । तर यो सबै बुझेर नै निर्णय लिएका हौं ।’

‘क्यामरुनविरुद्ध गोल गर्ने अवसर पनि सिर्जना भएको थियो । हामीले आफ्नो जिम्मेवारी बुझेका छौं । उक्त हारले खासै असर गरेको छैन । हामीले उक्त हारबाट पाठ सिकेका छौं ।’

‘क्यामरुनसँग हारेर घाटा भनेको चोट मात्र हो । हामीले दुई खेलाडी चोटका कारण गुमाउनुपर्यो । त्यसबाहेक दुखि हुनुपर्ने छैन । हामी समूह विजेता बनेर नै अघि बढेका छौं । नतिजाले असर गरेको छैन । पछिल्लो खेलमा विश्राम पाउँदा कोरियाविरुद्ध खेलमा भने केहि सहज हुनेछ । यसले हामी तुलनात्मक रुपमा फ्रेस छौं । कोरियाले भने कठिन खेलमा पूरै ९० मिनेट खेल्दा खेलाडी थाकेका हुन्छन् । यसले हामीलाई फाइदा हुन सक्छ ।’

सिल्भाले कोरिया एक स्तरीय टोली भएकाले खेल सहज नहुने बताए । ‘कोरियाविरुद्ध खेल सहज हुने छैन । प्राविधिक रुपमा पनि उनीहरु राम्रा छन् । आक्रमणमा हामीले उनीहरुलाई रोक्न सकेमात्र अघि बढ्न सक्छौं । र म फेरिपनि भन्छु, क्यामरुनविरुद्ध खेलले हामीलाई केहि असर गरेको छैन ।’

‘सनको बारेमा तोकेर केहि भन्न सक्दिन । उनीमात्र होइन कोरियाको टोलीमा अन्य खेलाडी पनि उच्च स्तरको फुटबल खेलिरहेका छन् । पछिल्लो खेलमा सनले दिएको अन्तिम पासको गोलले पनि उनीहरु स्तरीय टोली भएको पुष्टि गर्छ । म नाम तोकेर भन्न सक्दिन तर जर्सी नम्बर ६ र १८ ले राम्रो खेलेका छन् ।’