खेलकर्मीको नजरमा विश्वकप

प्रकाश तिमल्सिना, काठमाडौं

कतारमा जारी विश्वकप फुटबलमा अधिकांशले कुनै कुनै टोलीलाई समर्थन गर्दै हेरिरहेका हुन्छन् । नेपालमा पनि विश्वकपलाई पछ्याउने थुप्रै समर्थक छन् ।

खासगरि नेपालमा अर्जेन्टिना र ब्राजिलको समर्थक बढी रहेको विश्वास गरिन्छ । कतिपयले युरोपियन टोलीलाई समर्थन गरेको पनि सामाजिक सञ्जालमार्फत देख्न सकिन्छ । एसियालाई प्रतिनिधित्व गर्ने ३ टोली अन्तिम १६ मा पुग्न सफल भएकाले ती टोलीलाई समर्थक गर्नेको संख्या पनि बाक्लिदै जान थालेको छ ।

फुटबल अलि अलि पछ्याउन थालेपछि नेपाली महिला राष्ट्रिय टोलीकी फरवार्ड सावित्रा भण्डारी सम्बा भने पहेलो जर्सीबाट आकर्षित भइकी थिइन् । टेलिभिजनमा फुटबल हेर्ने क्रममा पहेलो जर्सी मन पराउँदा कुन टोली हो भन्ने उनले पछि मात्र थाहा पाएकी थिइन् ।

‘आफूले अलि अलि खेल्न थालेपछि टिभीमा पनि फुटबल हेर्न थाले । पहेंलो जर्सीबाट निकै आकर्षक लाग्यो’, उनले पूरानो दिन सम्झदै भनिन्,‘पछि दाईहरुबाट थाहा पाए पहेलो जर्सी लगाएर खेल्ने ब्राजिलयन टोली भन्ने । त्यसपछि विस्तारै टोलीलाई पछ्याउन थाले । थाहै नपाइ ब्राजिलको समर्थक बने ।’

ब्राजिलका चर्चित खेलाडी नेयमारको खेलबाट सावित्रा थप प्रभावित भइन् । ‘ब्राजिल भन्ने वित्तिकै नेयमार स्वत जोडिएर आउँछन्’, उनले थपिन्,‘ उनको खेल्ने शैलीबाट प्रभावित छु । कासिमेरोको खेल पनि मन पर्छ । पहिला ब्राजिललाई समर्थक गरेपछि त्यो टोलीबाट खेल्ने खेलाडीको पनि स्वतः समर्थक भइने रहेछ ।’

ब्राजिल सन्तुलित टोली भएका कारणले उपाधि जित्ने बलियो सम्भावना रहेको सावित्रालाई लाग्छ । यद्दपी अरु टोली पनि कमजोर छैनन् । अर्जेन्टिना, इङ्ल्यान्ड, फ्रान्सलाई पनि उनी उत्तिकै दाबेदार मान्छिन् ।

एसियाली टोलीको यसपटकको प्रदर्शनबाट पनि उनी खुसी छिन् । त्यसअर्थ ब्राजिलको समर्थक भएपनि एसियाली टोलीप्रति उनी उदार मन राख्छिन् । भन्छिन्, ‘एसियाली टोली जित्दै अघि बढुन् भन्ने पनि लाग्ने रहेछ । यसपटक एसियाली टोली मध्ये जापान, कोरिया, अस्ट्रेलियाले जसरी प्रदर्शन गरेका छन् । त्यसले भविष्यमा एसिया पनि दाबेदार बन्न सक्छन् भन्ने संकेत देखाएको छ । हामी एसियाली भएका नाताले त्यसमा खुसी लाग्नु स्वभाविक हो ।’

आज दुई एसियाली टोलीले अन्तिम १६ मा बलिया टोलीको सामना गर्दै छ । पाँच पटकको विजेता ब्राजिलले नेपाली समय अनुसार राती १२ः४५ बजे दक्षिण कोरियाको सामना गर्नेछ । त्यसअघि राती ८ः४५ बजे जापान र साविक उपविजेताबीच प्रतिस्पर्धा हुनेछ । एसियाली टोलीले अन्तिम १६ मा पनि बलियो टक्कर दिनेमा सावित्रा आशावादी छन् । विश्व कप विजेता रहिसकेका जर्मनी र स्पेन जस्ता टोलीलाई हराउँदै समूहको विजेताका रुपमा जापान अघि बढेकोले पनि आशा गर्ने ठाँउ देखिएको छ ।

पोर्चुगललाई हराउँदै दक्षिण कोरिया समूह उपविजेताका रुपमा प्रिक्वार्टरमा पुगेको थियो । युरोपियन टोलीलाई पनि बलियो चुनौती दिन सक्छन् भन्ने यसपटकको विश्व कपले थप उजागर गरेको सावित्रा मान्छिन् । भन्छिन्,’जापान, कोरियाको प्रदर्शनले एसियाली फुटबलको पनि भविष्य उज्ज्वल रहेको संकेत देखाएको छ । ’

ब्राजिललाई समर्थन गरेपनि व्यक्तिगत खेलाडी भने भने उनी पोर्चुगल टोलीका कप्तान क्रिस्टियानो रोनाल्डोको फ्यान हुन् । उनी रोनाल्डोकै शैलीमा गोलको सेलिब्रेसन गर्छिन् । रियल म्याड्रिडबाट व्यवसायिक फुटबल खेल्दा सावित्राले रोनाल्डोलाई खेल पहिलो पटक हेरेकी थिइन् । त्यति बेला उनी पोर्चुगलबाट खेल्छन् भन्ने सावित्रालाई थाहा थिएन । पछि बुझ्दै गएपछि रोनाल्डो पोर्चुगलबाट खेल्ने थाहा पाइन् । त्यसपछि उनको दोस्रो रोजोईमा पोर्चुगल रहने गरेको छ ।

‘रोनाल्डो खेलप्रति अति नै समर्पित भन्ने थाहा भयो । एकदमै दुःख गरेर त्यो ठाँउ सम्म पुगेको र मिहिनती भन्ने बुझियो’, उनले भनिन्,‘आफू पनि दुःखकै साथ राष्ट्रिय टोली सम्म आएकोले पनि होला उनको खेल जीवन र खेल कौशलबाट प्रभावित छु ।’ सावित्रा ती खेलाडी हुन् जसले राष्ट्रिय टोलीबाट ४० अन्तर्राष्ट्रिय खेल खेल्ने क्रममा ४० गोल नै गरेकी छिन् ।

एपिएफकी मुख्य खेलाडी मध्येकी एक सावित्रा पछिल्ला केहि वर्षयता आई लिग टोलीमा पनि आबद्ध रहँदै आएकी छिन् । यसपटक पनि उनी गोकुलम एफसीबाट खेल्ने तयारीमा छिन् । गोकुलम र सेतु महिला आइ लिग च्याम्पियन बन्दा सावित्रा त्यसको महत्वपूर्ण खेलाडी रहेकी थिइन् ।