म्यानचेस्टर (एजेन्सी)– याल्टान इब्राहिमोभिचले गोल गर्ने क्रममा निरन्तरता दिदा म्यानचेस्टर युनाइटेडले प्रिमियर लिगमा लगातार चौथो जित हासिल गरेको छ । इब्राहिमोभिचले १ गोल गर्दै अर्को दुई गोलका लागि पास मिलाएपछि युनाइटेडले बक्सिङ डेमा सोमबार सन्डरल्यान्डलाई ३–१ ले हराएको छ ।

डाले ब्लिन्डले ३९ औं मिनेटमा गोल गरेका थिए । यो सिजनमा ब्लिन्डको यो पहिलो गोल हो । इब्राहिमोभिच र मार्कोस रोजोकोले मिलेर निकालेको पासमा ब्लिन्ड गोलगर्न सफल भएका थिए । दास्रो हाफमा खेलमा नियन्त्रण बनाएको युनाइटेडका लागि इब्राहिमोभिचले ८२ औं मिनेटमा अर्को गोल थपे । पछिल्ला प्रिमियर लिगका सात खेलमा उनको त्यो आठौं गोल थियो । विपक्षी खेलाडीको गल्तिको फाइदा उठाउँदै पाउल पोग्बाले निकालेको पासमा इब्राहिमोचिभले गोल गरेका थिए ।

इब्राहिमोभिचकै क्रसमा हेनरिक मिकितारियनले खेल सकिन ४ मिनेटअघि आकर्षक गोल गरेका थिए । इन्जुरी समयमा फाबियो बोरिनीले सान्त्वना गोल फर्काएका थिए । १८ खेलमा युनाइटेडको ३३ अंक पुगेको छ । एक खेल कम खेलमा उत्तिनै अंक जोडेको टोटेनह्याम पाँचौं स्थानमा छ ।

ओलिभर जिर्रोडको गोलमा वेस्ट ब्रुमविचलाई १–० ले हराएको आर्सेनल अंक तालिकाको तेस्रो स्थानमा उक्लेको छ । १८ खेलमा आर्सनलको ३७ अक छ भने उत्तिनै अंक र एक खेल कम खेलेको लिभरपुल दोस्रो स्थानमा छ । ४६ अंकका साथ चेल्सी शीर्षस्थानमा रहेको छ ।

बक्सिङ डेका अन्य खेलमा साविक विजेता लेस्टर सिटीलाई एभर्टनले २–० ले हराएको छ । वेस्ट ह्यामले स्वान्सी सिटीलाई ४–० ले, चेल्सीले बोर्नमाउथलाई ३–० ले, बर्नलीले मिडल्सब्रोलाई १ –० ले हराएको छ भने वाटफोर्ड र क्रिस्टल प्यालेसले १ –१ को बराबरी खेलेका छन् ।