कतार (हाम्रो खेलकुद) – उपाधि दावेदार ब्राजिल फिफा विश्वकप कतार २०२२ को क्वाटरफाइनलमा प्रवेश गरेको छ । दक्षिण कोरियालाई राउन्ड अफ १६ को खेलमा ४-१ ले हराउँदै ब्राजिलले क्रोएसियासँग भिडन्त पक्का गरेको हो ।

खेलको सुरुवातदेखि नै आक्रामक देखिएको ब्राजिलले प्राप्त अवसर सदुपयोग गर्दै पहिलो हाफमा नै ४ गोलको फराकिलो अग्रता बनाएको थियो । बल पोसेसनमा बलियो पकड जमाउँदै आक्रमण बुनेको ब्राजिलले लगातार आक्रमणमा अवसर सिर्जना गर्दै कोरियालाई समस्या दिएको थियो । कोरियाले पाएको न्यून अवसरमा गोलरक्षक एलिसनलाई दुख दिएपनि गोल फर्काउन सकेन ।

दोस्रो हाफको सुरुवातमा पनि एलिसन नै कोरियाको गोलसामु बाधक बने । ब्राजिलका खेलाडीले एकपछि अर्को अवसर सदुपयोग गर्न नसक्दा कोरियाले भने एलिसनलाई समस्या दिइरह्यो । अन्त्यतिर कोरियाले गोल फर्काएपनि नतिजा बदल्न भने उक्त गोल काम लागेन ।

खेलको सातौं मिनेटमा ब्राजिलले भिनीसियस जुनिअरको गोलमा अग्रता लिएको थियो । पेनाल्टी क्षेत्रभित्र आएको बललाई उनले नियन्त्रणमा राख्दै संयमित फिनिस गरे । उनले बायाँ भागबाट गरेको प्रहारमा कोरियाली डिफेन्स र गोलरक्षक बिट भएका थिए ।

१३ औं मिनेटमा नेयमारले पेनाल्टीमा गोल गरे । पेनाल्टी क्षेत्रभित्र रिचार्लीसनलाई लडाएपछि रेफ्रीले पेनाल्टी दिएका थिए । २९ औं मिनेटमा रिचार्लीसनले ब्राजिललाई ३ गोलले अघि राखे । उनी आफैंले पेनाल्टी क्षेत्र बाहिर उत्कृष्ट बल नियन्त्रण गर्दै सुरु गरेको मुभ अन्त्यमा फिनिस गरेका थिए । थियागो सिल्भाले दिएको अन्तिम पासलाई उनले सहजै फिनिस गरेका थिए ।

३६ औं मिनेटमा ब्राजिलले चौथो गोल थप्यो । भिनिसियस जुनिअरको पासमा लुकास पाक्वेटाले गोल गरे । पेनाल्टी क्षेत्र भित्रबाट उनले गरेको पहिलो टचको प्रहार गोलरक्षक र डिफेन्स पार हुँदै गोल भएको थियो । इन्ज्युरी समयमा पाक्वेटाकै प्रहार गोलरक्षक किम सुङयुले विफल पारे ।

दोस्रो हाफको सुरुवातमा एलिसनले उत्कृष्ट बचाउ गर्दै कोरियालाई खेलमा फर्कन दिएनन् । वन भर्सेस वनमा ह्युङ मिन सनको प्रहार विफल पार्दै उनले खेल ४-० नै राखे । तर ७६ औं मिनेटमा एलिसनले कोरियाको गोल बचाउन सकेनन् । स्युङहो पाइकले फ्रिकिकबाट आएको रिबाउन्डलाई पेनाल्टी क्षेत्र बाहिरबाट शक्तिशाली प्रहारमार्फत गोलमा परिणत गरे ।

ब्राजिलले अब क्वाटरफाइनलमा क्रोएसियाको सामना गर्नेछ । आजै भएको अन्तिम १६ को खेलमा क्रोएसियाले जापानलाई हराएको थियो । १-१ को बराबरीपछि टाइब्रेकरमा पुगेको खेलमा क्रोएसिया ३-१ ले विजयी भएको थियो । यस्तै क्वाटरफाइनलमा नेदरल्यान्ड्सले अर्जेन्टिना तथा इंग्ल्यान्डले फ्रान्सको सामना गर्ने पक्का भइसकेको छ ।