एजेन्सी – अर्जेन्टिनी विंगर एन्जल डी मारियाले गत वर्ष अर्जेन्टिनी मिडिया टिवाईसी स्पोर्ट्ससँग अन्तर्वार्ताका दौरान लुइस भान गाललाई आफ्नो करिअरकै सबैभन्दा खराब प्रशिक्षक रहेको बताएका थिए ।
सन् २०१४ मा रियल म्याड्रिडबाट ६० मिलियन पाउण्डमा म्यानचेस्टर युनाइटेड आएका डी मारियाको सम्बन्ध भान गालसँग राम्रो हुन सकेन । युनाइटेडका प्रशिक्षक रहेका भान गालले उनलाई त्यस वर्ष जम्मा २० खेलमा सुरुवात गराए । खेलाडी र प्रशिक्षकबीच राम्रो सम्बन्ध नभएपछि अर्को वर्ष नै डी मारिया पेरिस सेन्ट जर्मेन (पिएसजी) तर्फ लागेका थिए ।
फिफा विश्वकप कतार २०२२ को क्वाटरफाइनलमा नेदरल्यान्ड्स र अर्जेन्टिना भिड्दा यी दुई आमनेसामने हुनेछन् । खेलको पूर्व सन्ध्यामा भान गालले डी मारियाको भनाइप्रति यस्तो टिप्पणी गरे, ‘मलाई एन्जलले यसो भनेको थाहा पाउँदा मन परेन । यो राम्रो होइन । तर कहिलेकाहीं प्रशिक्षक भएपछि लिने निर्णयले सबैलाई खुसी बनाउँदैन,’ उनले भने ।
त्यसो त डी मारियापछि युनाइटेड पुगेका मेम्फिस डिपाएसँग पनि भान गालको सम्बन्ध राम्रो थिएन । प्रशिक्षक भान गालले त्यसैलाई उदाहरणको रुपमा प्रयोग गर्दै समयले सबै परिवर्तन गर्न सक्ने बताए ।
‘मेरो बारेमा नराम्रो बोल्ने निकै कम खेलाडीमा एन्जल परे । नत्र धेरैजसो खेलाडीले ठिक विपरित बोलेका हुन्छन्,’ उनले थपे, ‘मेम्फिसलाई हेर्नुस । युनाइटेडमा हामी कस्तो अवस्थामा थियौं र अहिले एक अर्कासँग नजिक छौं । म उनलाई किस पनि गर्न सक्छु ।’
