एजेन्सी – फिफा विश्वकप कतार २०२२ अन्तर्गत अर्जेन्टिनाले दोस्रो क्वाटरफाइनलमा नेदरल्यान्ड्सविरुद्ध अग्रता लिएको छ । नाहेल मोलिनाको गोलमा अर्जेन्टिना पहिलो हाफमा १-० ले अघि छ ।

मोलिनाले ३५ औं मिनेटमा गोल गर्दै अर्जेन्टिनालाई अग्रता दिलाए । उनले कप्तान लिओनेल मेस्सीको अविश्वसनीय पासलाई वन भर्सेस वनको स्थितिमा फिनिस गरेका थिए । मेस्सीले बल लिएर पेनाल्टी क्षेत्रको बायाँतर्फ बढ्न लागेको अवस्थामा नेदरल्यान्ड्सको पूरै डिफेन्स लाइन चिर्नेगरी अगाडि पास खेलेका थिए । मेस्सीले अगाडि नहेरी दिएको पास मोलिनाकै पथमा पुगेपछि उनले गोल गरे ।

त्यसअघि नेदरल्यान्ड्सले एकपटक पोस्टतर्फ गरेको आक्रमण सफल हुन सकेको थिएँ । स्टिभन बर्गवाइन र कोडी गाक्पोले आफ्नो गतिको प्रयोग गर्दै अर्जेन्टिनी डिफेन्सलाई केहि समस्या दिएपनि गोलरक्षक मार्टिनेजले खासै समस्या सामना गर्नुपरेको छैन ।

यता मेस्सीले भने आफैं पनि गोलको अवसर सिर्जना गरेका थिए । गोलरक्षक नोपर्टले उनको एक प्रहार विफल पारेका छन् । यसबाहेक मेस्सीले लगातार डच मिडफिल्ड र डिफेन्सको वरपर रहेर बललाई पेनाल्टी क्षेत्र वरपर खेलिरहेका छन् ।

यस खेलको विजेताले सेमिफाइनलमा क्रोएसियाको सामना गर्नेछ । क्रोएसियाले आज सम्पन्न पहिलो क्वाटरफाइनलमा ब्राजिललाई टाइब्रेकरमा ४-२ ले पराजित गरेको थियो ।