बिर्तामोड (हाम्रो खेलकुद)– मोफसलकोे प्रतिष्ठित फुटबल प्रतियोगिता झापा गोल्ड कपको दोस्रो संस्करण शुक्रबारसुरु हुने भएको छ । गोल्डकपको मुल आयोजक समितिले बुधबार पत्रकार सम्मेलन गर्दै माघ १५ देखि २४ गतेसम्म प्रतियोगिता सञ्चालन गर्ने जानकारी गरायो ।

आयोजक समितिका अध्यक्ष महेन्द्र गिरीले झापा गोल्डकपको दोस्रो संस्करणमा पुरस्कार राशि पनि बढाइएको बताए । ‘यसपटकको विजेताले ७ लाख रुपैयाँसहित ट्रफी पाउनेछ’, उनले भने, ‘दोस्रो हुने टोलीले ३ लाख ५० हजार रुपैयाँ प्राप्त गर्नेछ । ’ तीन विदेशी टिमसहित १० टोलीले प्रतियोगितामा भाग लिने झापा जिल्ला फुटबल संघका अध्यक्ष जलकुमार गुरुङले बताए । भुटान, भारतको सिक्किम र मुम्बईबाट एक एक , आयोजक रमपम झापा ११ सहितको टोलीले प्रतिस्पार्ध गर्नेछ । ‘यो गोल्डकप झापाकै गहना हो’, आयोजक समितिका अध्यक्ष गिरीले भने, ‘फुटबल पर्यटनको रुपमा झापालाई विकसित गराउने हाम्रो लक्ष्य हो ।’

७५ लाख रुपैयाँ खर्च हुने अनुमान गरिएको गोल्डकपबाट एक करोड संकलनको लक्ष्य राखिएको छ । पाँच हजार सिजनल टिकट घरदैलो अभियानमार्फत विक्रि गरि आर्थिक संकलगन गर्ने योजना आयोजक समितिको रहेको अध्यक्ष गिरिले बताए । उनले भने, ‘घरदैलो सहयोग जुटाएर चन्दा माग्ने प्रवृत्तिको अन्त्य गर्ने हाम्रो सङ्कल्प हो ।’

समितिका महासचिव केशवराज दाहालले गोल्डकपका लागि १ सय ११ सदस्यीय मुल आयोजक समिति र ५१ सदस्यीय सल्लाहकार समिति गठन गरिएको छ । समितिका बरिष्ठ उपाध्यक्ष बलराम कार्कीले प्रतियोगिता सफल पार्न सञ्चारकर्मीसँग सहयोगको आग्रह गरे । १० दिन सम्म चल्ने प्रतियोगिताले अहिले सम्म मुख्य प्रायोजक भने पाइसकेको छैन ।