दिपेश तिमल्सिना
सिलगुढी – चौथो साफ च्याम्पियनसिपको दोस्रो खेलमा पनि नेपालले दमदार प्रदर्शनलाई निरन्तरता दिएको छ । सिलगुढीको कञ्चनजंगा मैदानमा जारी खेलको पहिलो हाफको समाप्तीमा नेपालले ३–० को अग्रता लिएको छ । नेपालको खेलमा आज पनि केन्द्रमा सावित्रा भण्डारी नै रहेकी छिन् ।
पहिलो खेलमा भुटानलाई ८–० ले हराउँदा दोहोरो ह्याट्रिक गरेकी सावित्राले माल्दिभ्सविरुद्ध पनि ह्याट्रिक गरेकी छिन् । १२ औं मिनेटमा पेनाल्टी बक्स भित्र विपक्षी गोलकिपर अघि बढेको मौका छोप्दै उनलाई नघाएर सावित्रा भण्डारीले गोल गरेकी थिइन् ।
उनले अर्को गोल २८ मिनेटमा गरिन् । दीपाले सेन्टरबाट दिएको पासलाई एक्लै अघि बढाउँदै सावित्राले पेनाल्टी बक्सको दायाँबाट प्रहार गरेको बल गोलमा परिणत भएको थियो । पहिलो हाफका लागि ६ मिनेट बाँकी रहँदा सावित्राले अर्को गोल गर्दै ह्याट्रिक गरेकी थिइन् । अनिताले प्रहार गरेका कर्नर गोलकिपरले नियन्त्रणमा लिन नसक्दा सावित्राले हेडमार्फत गोल गरेकी थिइन् । साफ च्याम्पियनसिपमा यसअघिको दुई पटकको भेटमा नेपालले माल्दिभ्सलाई हराएको थियो ।
