दिपेश तिमल्सिना
सिलगुढी (भारत)- चौथो दक्षिण एसियाली महिला फुटबल (साफ) च्याम्पियनसिपमा समूह चरणको अन्तिम खेलमा नेपालले भोली श्रीलंकाबिरुद्ध खेल्दैछ । समूह चरणको दुई खेल जितेको नेपालको सेमिफाइनलको यात्रा लगभग पक्का भएको छ । खेल भोली दिउसो २:३० बजे नेपाली समयमा सुरु हुनेछ।
यस भन्दा अगाडि सन २०१४को वुमेन्स साफमा नेपालले श्रीलंकालाई ३-०ले पराजित गरेको थियो, उक्त खेलमा नेपालका लागि अनु लामाले दुई र निरु थापाले एक गोल गरेकी थिईन। साफमा दोस्रो पटक श्रीलंकासँग प्रतिस्पर्धा गर्न लागेको नेपालले पुरानो नजितालाई कायम गर्ने योजनामा छ भने श्रीलंका बदला लिने दाउमा छ । पहिलो दुई खेलमा नेपालले भुटान र माल्दिभ्सबिरुद्ध फराकिलो जित हात परेको थियो।
नेपालका टिम प्रशिक्षक कुमार थापाले श्रीलकासँगको खेलमा पनि नेपालले जित्ने विश्वास लिए । ‘हामी भोलिको खेल जित्नेमा ढुक्क छौ, खेलाडीहरुले हामीले प्रतियोगिता अगाडि अपेक्षा गरे भन्दा राम्रो खेल प्रदर्शन गरी रहेका छन’, उनले भने,’ नेपाललाई समुह चरणमा तीन खेल भएर फाईदा पुगेको छ। भोलि खेलसम्ममा टिमका सबै २० खेलाडीहरुले खेल्न पाउने छन।”
दुई खेलमा ११ गोल गरिसकेकी सबित्राको बारेमा बोल्दै प्रशिक्षक थापाले भने,’ सबित्राले निकै राम्रो प्रदर्शन गरीरहेकी छिन र उनलाई अरु खेलाडीहरुले राम्रो साथ दिरहेका छन। हामी उनले श्रीलंकाबिरुद्ध पनि राम्रो प्रदर्शन गर्नेमा बिश्वस्त छौ ।”
