एजेन्सी – प्रिमियर लिग क्लब चेल्सीले अर्जेन्टिनी मिडफिल्डर एन्जो फर्नान्डेजलाई लिगकै कीर्तिमानी रकम खर्चेर अनुबन्ध गरेको छ ।

चेल्सीले पोर्चुगिज क्लब बेन्फिकालाई १ सय ७ मिलियन पाउण्ड तिरेर एन्जोलाई अनुबन्ध गरेको हो । प्रिमियर लिगमा खेलाडी अनुबन्ध गर्न खेलाडीलाई खर्च गरिएको यो सर्वाधिक रकम हो । यसअघि म्यानचेस्टर सिटीले एस्टन भिल्लाबाट ज्याक ग्रिलिसलाई १ सय मिलियन पाउण्डमा अनुबन्ध गरेको थियो ।

त्यस्तै एन्जो अर्जेन्टिनाका सर्वाधिक महँगा खेलाडी पनि बनेका छन् । यसअघि फरवार्ड गोन्जालो हिगुआइनलाई युभेन्टसले ९० मिलियन युरोमा अनुबन्ध गएको थियो । त्यसअघि म्यानचेस्टर युनाइटेडले रियल म्याड्रिडबाट ७५ मिलिय्ब युरो खर्चेर एन्जल डी मारियालाई भित्र्याएको थियो ।

२२ वर्षीय मिडफिल्डरले चेल्सीमा साढे ८ वर्षका लागि सम्झौता गरेका छन् । यसै सिजनको सुरुवातमा बेन्फिकाले १० मिलियन पाउण्ड खर्चेर एन्जोलाई अनुबन्ध गरेको थियो । त्यसबेलाको सम्झौता अनुसार एन्जोको पूर्व क्लब रिभर प्लेटले ट्रान्सफरको २५ प्रतिशत रकम पाउनेछ ।

कतारमा सम्पन्न फिफा विश्वकप २०२२ मा उत्कृष्ट युवा खेलाडीको अवार्ड जितेपछि उनको चर्चा चुलिएको थियो । अर्जेन्टिनालाई विश्वकप उपाधि दिलाउन एन्जोले उत्कृष्ट प्रदर्शन गरेका थिए । उनले मेक्सिकोविरुद्ध २-० को जितमा गोल समेत गरेका थिए ।

चेल्सीले यसपटक विन्टर ट्रान्सफर विन्डोमा खुलेर खर्च गरेको छ । एटलेटिको म्याड्रिडबाट जोआओ फेलिक्सलाई लोनमा ल्याएको चेल्सीले नोनी मादुएके, मिखालो मुड्रीक, डेविड फोफाना, आन्द्रे सान्तोस, बेनोइत बादशिएल र मालो गुस्टोलाई स्थायी अनुबन्धन गरेको हो ।