हेटौडा (हाम्रो खेलकुद)– टुबोर्ग दोस्रो हेटौडा गोल्डकप शनिबारबाट पुनः सञ्चालन हुँदा नेपाल पुलिस क्लब र पोखराको सहारा क्लबबीच प्रतिस्पर्धात हुनेछ । हेटौंडा–१० स्थित फरेष्ट्री खेल मैदानमा खेल अपरान्ह ३ बजे सुरु हुनेछ । पूर्वाञ्चलमा सातौं राष्ट्रिय खेलकुदको समापनका कारण गोल्डकपमा शुक्रबार कुनै प्रतिस्पर्धा नराखिएको आयोजक प्रतिष्ठानले जनाएको थियो ।
पुलिस सातौं राष्ट्रिय खेलकुदमा कांस्य पदक जितेपछि पहिलो प्रतियोगिता खेल्न हेटौडामा पुगेको हो । सुमन भोम्जन स्मृति खेलकुद प्रतिष्ठानको आयोजनमा बिहीबार सुरु भएको प्रतियोगिताको पहिलो खेलमा प्राइम पोलि क्लिनिक विजय युथले ए डिभिजन क्लब सरस्वती क्लबलाई टाइब्रेरकमा ३–१ ले हराएको थियो ।
पुस २३ गतेसम्म सञ्चालना हुने प्रतियोगितामा दुई विदेशीसहित १० टोलीको सहभागिता रहेको छ । प्रतियोगिताको विजेता टोलीले उपाधिसहित ५ लाख र दोस्रो हुने टोलीले ३ लाख रुपैयाँ प्राप्त गर्नेछ । प्रतियोगिताको सर्वोत्कृष्ट खेलाडीलाई ५० हजार रुपियाँ र विधागत उत्कृष्ट खेलाडी तथा प्रशिक्षकले समान ३ हजार रुपैयाँ पाउनेछन् ।
