काठमाडौं (हाम्रो खेलकुद) – त्रिभुवन आर्मी क्लब केपी ओली कप फुटबल प्रतियोगिताको सेमिफाइनलमा प्रवेश गरेको छ । टाइब्रेकरमा न्यु रोड टिम (एनआरटि) लाई ५-४ ले पराजित गर्दै आर्मी अन्तिम चारमा स्थान पक्का गरेको हो ।

सातदोबाटोस्थित एन्फा कम्प्लेक्सको मैदानमा निर्धारित ९० मिनेटको खेल १-१ को बराबरीमा सकिएपछि खेलको निर्णय सिधै टाइब्रेकरबाट लिइएको थियो । एनआरटिका लागि लाल्मिन्जामाले गोल गर्दा आर्मी आत्मघाती गोलमार्फत खेलमा फर्किएको थियो ।

टाइब्रेकरमा एनआरटिका जान एनबोमीले पहिलो प्रहारमा गोल गर्दा आर्मीका जगजित श्रेष्ठको प्रहार पोस्टमा लाग्दै गोलमा परिणत भयो । आर्मीका गोलरक्षक विकेशले एनआरटिका लागि दोस्रो नम्बरमा आएका स्टेफन जुनिअरको फितलो प्रहार बचाए । लगत्तै टेकबहादुर बुढाथोकीले आर्मीलाई अघि बढाए ।

एनआरटिका लाल्मिन्जामाले पेनाल्टीमा गोल गर्दा आर्मीका विकास खवासले पनि आफ्नो प्रहारमा कुनै गल्ती गरेनन् । त्यसपछि एनआरटिका निकोलस संग र विक्रम धिमालले गोल गर्दा आर्मीका दीनेश हेन्जन र नवयुग श्रेष्ठले पनि पेनाल्टीमा गोल गर्दै आर्मीलाई जित दिलाए ।

३२ औं मिनेटमा एनआरटिले अग्रता लिएको थियो । भारतीय फरवार्ड लाल्मिन्जामाले उत्कृष्ट फिनिस गर्दै दबाब कायम गरिरहेको आर्मीलाई स्तब्ध पारेका थिए । दीपेश आले मगरसँग पेनाल्टी क्षेत्र बाहिर पास साटासाट गर्दै उनले डिफेन्स लाइन बिट गरे । त्यसपछि पेनाल्टी क्षेत्रभित्र प्रवेश गर्दै लाल्मिन्जामाले टप कर्नरमा गोल गरे ।

दोस्रो हाफमा आर्मी आत्मघाती गोलको सहयोगमा खेलमा फर्कियो । जगजित श्रेष्ठको फ्रिकिकमा दीपक गुरुङले गरेको हेडर पोस्टमा लागेको थियो । तर पोस्टमा लागेर फर्केको बल गोल बचाउन पछि आइरहेका एनआरटि कप्तान विक्रम धिमाललाई लाग्दै गोल भएको थियो ।

आजै हुने तेस्रो क्वाटरफाइनलमा मच्छिन्द्र क्लब र चर्च ब्वाइज युनाइटेडबीच खेल हुनेछ । भोली हुने अन्तिम क्वाटरफाइनलमा आयोजक केपी ओली क्लब र जावलाखेल युथ क्लबबीच प्रतिस्पर्धा हुनेछ ।

आर्मीले अब फाइनल प्रवेशका लागि आइतबार सातदोबाटो युवा क्लबको सामना गर्नेछ । विहीबार भएको उद्घाटन खेलमा सातदोबाटोले नेपाल पुलिस क्लबलाई २-१ ले हराएको थियो ।

प्रतियोगिताको विजेताले उपाधिसहित १० लाख र दोस्रो हुने टोलीले ५ लाख रुपैयाँ प्राप्त गर्नेछ । हरेक खेलको विजेताले २५ हजार रुपैयाँ प्राप्त गर्नेछ । प्रतियोगिताको सर्वोत्कृष्ट खेलाडीले १ लाख, उदियमान खेलाडी, सर्वाधिक गोलकर्ता, गोलकिपरले समान ५० हजार, हरेक खेलको म्यान अफ दी म्याचले १५ हजार रुपैयाँ प्राप्त गर्नेछन् ।