काठमाडौं (हाम्रो खेलकुद) – ‘ए’ डिभिजनको नव प्रवेशी चर्च ब्वाइज युनाइटेडलाई पराजित गर्दै लिग च्याम्पियन मछिन्द्र फुटबल क्लब केपी ओली कप राष्ट्रिय फुटबल च्याम्पियनसिपको सेमिफाइनलमा प्रवेश गरेको छ ।

चर्च ब्वाइजलाई २–१ ले पराजित गर्दै मछिन्द्र अन्तिम चारमा पुगेको हो । सातदोबाटोस्थित एन्फा कम्प्लेक्सको मैदानमा शुक्रबार भएको खेलमा मछिन्द्रको जितमा कप्तान सुजल श्रेष्ठ र रन्जित धिमालले गोल गरे । चर्च ब्वाइजले एक गोल उपहार पाएको थियो ।

खेलको १६औं मिनेटमा कप्तान सुजलले फ्रिकिकमार्फत गोल गर्दै मछिन्द्रलाई १–० को अग्रता दिलाए । पेनाल्टी बक्सबाहिर विमल घर्तीमगरलाई फ्रान्कलिन कोटे टालाले फउल गरेपछि प्राप्त फ्रिकिकलाई सुजलले गोल गर्न सफल भएका थिए ।

४०औं मिनेटमा रन्जित धिमालले खाली पोस्टमा गोल गर्दै मछिन्द्रको अग्रता दोब्बर पारे । देवेन्द्र तामाङको लामो पासलाई फरवार्ड गगन दिप सिंहले नियन्त्रणमा लिन नसकेको बलमा गोलरक्षक रेम्वो कुमार चौधरी अघि बढ्दै बचाउने प्रयास गरेपनि रन्जित चुकेनन् ।

६६औं मिनेटमा छिरिङ गुरुङले आत्मघाती गोल गर्दा खेल २–१ को स्थितिमा पुग्यो । गगन दिप सिंहको क्रसलाई क्लियर गर्न क्रममा छिरिङले आफ्नै पोस्टमा गोल गर्न पुगेका पुगेका थिए ।

त्यसपछि थप गोल निस्कन नसक्दा मछिन्द्रले खेल जित्दै सेमिफाइनलमा पुग्न सफल भयो । मछिन्द्रका कप्तान सुजल श्रेष्ट प्लेयर अफ दि म्याच घोषित भए । उनले १५ हजार रुपैयाँ हात पारे । शुक्रबार नै आर्मीले एनआरटीलाई टाइब्रेकरमा ५–४ ले पराजित गर्दै सेमिफाइनलमा पुगेको छ ।

भोली हुने अन्तिम क्वाटरफाइनलमा आयोजक केपी ओली क्लब र जावलाखेल युथ क्लबबीच प्रतिस्पर्धा हुनेछ । यस खेलको विजेताले मछिन्द्रसँग खेल्नेछ ।

प्रतियोगिताको विजेताले उपाधिसहित १० लाख र दोस्रो हुने टोलीले ५ लाख रुपैयाँ प्राप्त गर्नेछ । हरेक खेलको विजेताले २५ हजार रुपैयाँ प्राप्त गर्नेछ । प्रतियोगिताको सर्वोत्कृष्ट खेलाडीले १ लाख, उदियमान खेलाडी, सर्वाधिक गोलकर्ता, गोलकिपरले समान ५० हजार रुपैयाँ प्राप्त गर्नेछन् ।