एजेन्सी – स्पेनिस क्लब रियल म्याड्रिडका पुर्व डिफेन्डर ब्राजिली मार्सेलो आफ्नो बाल्यकालको क्लब फ्लुमिनेन्समा फर्किएका छन् ।

गत वर्ष रियल म्याड्रिडबाट बाहिरिएपछि मार्सेलो ग्रीसको सुपर लिग क्लब ओलम्पियाकोसमा अनुबन्ध भएका थिए । उनले त्यहाँ एक सिजन बिताएपछि रियल म्याड्रिडका पूर्व डिफेन्डर मार्सेलोले २०२४ को अन्त्यसम्मको लागि सम्झौतामा हस्ताक्षर गर्दै बाल्यकालको क्लब फ्लुमिनेन्समा फर्किएका हुन् ।

अनुभवी लेफ्ट ब्याक १७ वर्षपछि ब्राजिल फर्किएका छन् । रियो दि जेनेरियोमा रहेको फ्लुमिनेन्सबाट उनले २००५ मा सिनियर टोलीमा डेब्यु गरेका थिए । त्यहाँ डेढ वर्ष बिताएपछि उनी रियल म्याड्रिडमा अनुबन्ध भएका थिए ।

म्याड्रिडमा १५ वर्ष बिताउँदा उनी टोलीका मुख्य सदस्य बने । सेप्टेम्बरमा सान्टियागो बर्नाबेउबाट बाहिरिएपछि ३४ वर्षीया मार्सेलोले ग्रीसको ओलम्पियाकोसमा आबद्ध भएका थिए । उनले गत साता आफ्नो सम्झौता समाप्त गरे ।

फ्लुमिनेन्स ब्राजिली सिरी ‘ए’ मा यो सिजन तेस्रो स्थानमा रहेको छ । टोली शीर्ष तीनम ापर्ने लक्ष्यमा रहँदा अनुभवी र स्टार खेलाडी भित्र्याउने लक्ष्यमा रहनेछ । मार्सेलोले सामाजिक सञ्जालमा ‘त्यहाँ फर्कनुहोस् जहाँ यो सबै सुरु भयो ।’ भनेर पोस्ट गरेका छन् ।

म्याड्रिडबाट मार्सेलोले १५ वर्षको अवधिमा २५ उपाधि जितेका छन् । उनले रियलबाट ६ ला लिगा र पाँच च्याम्पियन्स लिग जितेका छन् ।

मार्सेलोले ब्राजिलका लागि २००६ देखि २०१८ को अवधिमा ५८ क्याप जित्दा ६ अन्तर्राष्ट्रिय गोल गरेका छन् । मार्सेलोले ब्राजिलबाट सन् २०१३ मा फिफा कन्फेडेरेसन कप जितेका छन् । उनले ब्राजिलको यू२३ टोलीबाट २००८ मा कास्य र २०१२ मा रजत पदक जितेका छन् ।