एजेन्सी – स्पेनिस ला लिगाको म्याड्रिड ‘डर्वी’ मा आज राति रियल म्याड्रिड र एट्लेटिको म्याड्रिडबीच प्रतिस्पर्धा हुँदैछ ।

यो खेल रियल म्याड्रिडको मैदान सान्टियागो बर्नबेउमा नेपाली समयअनुसार राति ११:१५ बजे हुनेछ । घरेलु मैदानमा हुने खेलमा रियल पाहुना टोली एट्लेटिकोलाई पराजित गर्दै अंका तालिका सुधार गर्दै शीर्षस्थानको बार्सिलोनासँगको अंक दुरी छोट्याउने योजनामा मैदान उत्रनेछ ।

रियल २२ खेलबाट ५१ अंक जोडेर दोस्रो स्थानमा रहेको छ । टोलीसँग लयमा रहेका कप्तान तथा फरवार्ड करिम बेन्जेमा, भिनिसियस जुनियर रहेका छन् । चोटका कारण केही खेल गुमाएका बेन्जेमाले १३ खेलमा ११ गोल र ३ असिस्ट प्रदान गरेका छन् । भिनिसियसले यो सिजन २१ खेलमा ७ गोल र ४ असिस्ट प्रदान गरिसकेका छन् ।

यस्तै टोलीसँग फेडे भाल्भेर्डे, टोनी क्रुस, ओरेलिएन चुआमेनी, ड्यानियल सेवालोस, लुका मोड्रिच, नाँचो फर्नान्डेस, एन्टेनियो रुडिगर, एडर मिलिसाओ, ड्यानी कार्भाजल र गोलरक्षक थिवाउट कोर्टुवा रहेका छन् । चोटका कारण रोड्रिगोले खेल्ने सम्भावना न्युन रहँदा डेभिड अलाबा र फर्लान्ड मेन्डी पनि टोलीमा हुने छैनन् ।

यता, एट्लेटिको पनि रियललाई उसकै मैदानमा स्तब्धपूर्ण नतिजा निकाल्दै अंक तालिका सुधार गर्दै तेस्रो स्थानमा उक्लने योजनामा हुनेछ । रियललाई पराजित गर्न सकेको अवस्था तथा अर्काे खेलमा रियल सोसिडाड पराजित भएको खण्डमा एट्लेटिको तेस्रो स्थानमा उक्लनेछ ।

टोलीसँग फ्रान्सेली फरवार्ड एन्टोइन ग्रिजमन, मेम्फिस डिपाए, अल्भारो मोराटा, यान्निक कारास्को, सउल निग्वेज, कोकी, पाब्लो बारिओस, मार्काेस लोरेन्टे, रेइनिल्डो, मारियो हर्माेसो, स्टेफन साभिच, नाहुइल मोलिना र गोलरक्षक जान ओब्लाक टोलीमा हुनेछन् । चोटका कारण रोड्रिगो डि पउल र सर्जियो रिगुइलोन टोलीमा हुनेछैनन् ।

एन्टोइन ग्रिजमन, मेम्फिस डिपाए र अल्भारो मोराटाले यो सिजन गोलका लागि संघर्ष गरिरहेका छन् । ग्रिजमनले यो सिजन ला लिगामा २२ खेलमा ६ गोल र ६ असिस्ट दिएका छन् ।

पछिल्लो दुई खेलमा रियलले एट्लेटिकोसँग हार बेहोरेको छैन । १९ सेप्टेम्वर २०२२ मा २–१ को जित निकालेको रियलले त्यसपछि २७ जनवरी २०२३ मा कोपा डेल रेको क्वाटरफाइनलमा अतिरिक्त समयमा ३–१ को जित निकालेको थियो ।

यि दुई टोलीको पछिल्लो ४४ खेलको नतिजामा रियल २० खेलमा विजयी भएको छ । ११ खेल एट्लेटिकोले जित्दा १३ खेल बराबरीमा सकिएको छ ।

अन्य खेल

स्पान्योलविरुद्ध मलोर्का (साँझ ६:४५ बजे)

क्याडिजविरुद्ध रायो भालेकानो (रातको ९ बजे)

भ्यालेन्सियाविरुद्ध रियल सोसिडाड (मध्यरात १:४५ बजे)