काठमाडौं (हाम्रो खेलकुद) – विभागीय त्रिभुवन आर्मी फुटबल क्लबलाई सडन डेथमा पराजित गर्दै सातदोबाटो युथ क्लब केपी ओली कप राष्ट्रिय फुटबल च्याम्पियनसिपको फाइनलमा प्रवेश गरेको छ ।

आर्मीलाई सडनडेथमा ६–५ ले पराजित गर्दै सातदोबाटो उपाधि नजिक पुगेको हो । सातदोबाटो स्थित एन्फा कम्प्लेक्सको खेल मैदानमा सोमबार भएको खेलको दोस्रो हाफमा कुनै गोल निस्कन नसकेपछि खेल टाइब्रेकरमा लम्बिएको थियो । जसमा सातदोबाटोले बाजी मार्यो ।

टाइब्रेकरमा सातदोबाटोका सुदिप गुरुङले गोल गर्दा दोस्रो पेनाल्टीमा दीपक राज सिंह ठकुरीको प्रहार आर्मीका गोलरक्षक विकेश कुथले बचाए । अब्दुल अबु बकारी, एकराज बुढाथोकी र विलियम असिडिउले गोल गरे । सडन डेथमा सुरज गुरुङ र पासाङ लामाले गोल गर्न सफल भए ।

आर्मीका दिनेश हेन्जन, टेक बहादुर बुढाथोकी, सेसेहाङ आङदेम्वे, नवयुग श्रेष्ठले गोल गर्दा तेस्रो पेनाल्टी प्रहार गर्न आएका विकास खवासको प्रहार क्रसबारमा लागेर फर्कियो । त्यसपछि सडन डेथमा दीपक गुरुङले गोल गर्दा सुदिल राईको प्रहारलाई गोलरक्षक अभिषेक बरालले बचाए ।

अभिषेक नै खेलको प्लेयर अफ दि म्याच घोषित भए । उनले १५ हजार रुपैयाँ र ट्रफी प्राप्त गरे । विजेता सातदोबाटोले गेम जितेवापत २५ हजार रुपैयाँ प्राप्त गरेको छ । आइतबार नै हुनुपर्ने खले काठमाडौं उपत्यकामा भएको वर्षासँगै चट्याङपछि दोस्रो हाफ आज (सोमबार) भएको थियो ।

आज नै दोस्रो सेमिफाइनलमा मछिन्द्र फुटबल क्लब आयोजक केपी एफसीबीच दिउँसो ३ बजे हुनेछ । राष्ट्रिय युवा संघ नेपालले आयोजना गरेको प्रतियोगितामा आठ टोलीको सहभागिता रहेको छ ।

विजेताले उपाधिसहित १० लाख नगद तथा उपविजेताले ५ लाख नगद प्राप्त गर्ने आयोजकले जनाएको छ ।प्रतियोगिताका सर्बोत्कृष्ट खेलाडीले १ लाख नगद पाउने छन् । त्यसैगरी उत्कृष्ट गोलरक्षक, उत्कृष्ट गोलकर्ता र उदियमान खेलाडीले ५० हजार पाउने छन् ।