काठमाडौं (हाम्रो खेलकुद) – अखिल नेपाल फुटबल संघ (एन्फा) ले पेरिस ओलम्पिक २०२४ को एसियाली छनोटको लागि नेपालको महिला टोलीकाे प्रारम्भिक घोषणा गरेको छ ।

महिला टोलीका मुख्य प्रशिक्षक अनन्तराज थापाले सोमबार ३५ सदस्यीय प्रारम्भिक टोलीको घोषणा गरेका हुन् । चोटका कारण डिफेन्डर गीता रानालाई टोलीमा समावेश गरिएको छैन । बन्द प्रशिक्षण फागुन १९ गतेदेखि एन्फा कम्प्लेक्समा सुरु हुने एन्फाले जनाएको छ ।

सन् २०२४ मा फ्रान्समा आयोजना हुने पेरिस ओलम्पिकको एसियाली छनोटअन्तर्गत महिला फुटबलको समूह ‘सी’ का खेलहरू नेपालमा हुँदैछ । नेपाल रहेको समूह ‘सी’ मा अफगानिस्तान र भियतनाम छ । अफगानिस्तानले अप्रिल ५ मा भियतनामसँग खेल्नेछ । नेपालले आफ्नो पहिलो खेल अप्रिल ८ मा अफगानिस्तानसँग खेल्नेछ । अप्रिल ११ मा भियतनामसँग खेल्नेछ । खेलहरु त्रिपुरेश्वरस्थित दशरथ रंगशालामा हुनेछ ।

ओलम्पिक छनोटको तयारीकै लागि नेपालले भारतसँग दुई अन्तर्राष्ट्रिय मैत्रीपूर्ण खेल खेल्दा नेपालको प्रशिक्षण थापाले गरेका थिए । नेपालले भारतसँगको पहिलो खेलमा २–२ गोलको बराबरी तथा दोस्रो खेलमा गोलरहित बराबरी खेलेको थियो ।

प्रारम्भिक टोली
एन्जिला तुम्बापो सुब्बा, अञ्जना राना मगर, उषा नाथ, विमला विक, सपना राई, अमृता जैशी, हिरा कुमारी भुजेल, निशा थोकर, समीक्षा घिमिरे, प्रीति राई, अनिता बस्नेत, अनिता केसी, विमला चौधरी, दिपा शाही, सरु लिम्बु, रेनुका नगरकोटे, सविता राना मगर, निर्मला विक, सावित्रा भण्डारी, अमिषा कार्की, रश्मी कुमारी घिसिङ, रेखा पौडेल, रजनी थोकर, पूजा राना, दीपा न्यौपाने, सरस्वती ऐर, सरस्वती हमाल, अन्जली वाइबा, सिर्जना चेम्जोङ, गंगा गुरुङ, मन्जली कुमारी योन्जन, चन्द्रा भण्डारी, प्रतिक्षा चौधरी, मेनुका आले मगर र सारा बज्राचार्य