एजेन्सी – इंग्लिस प्रिमियर लिग क्लब चेल्सीका ब्राजिली भेट्रान डिफेन्डर थियागो सिल्भा कम्तीमा ६ साता मैदान बाहिर रहने भएका छन् ।

प्रिमियर लिग अन्तर्गत टोटनहम हटस्परसँग २–० ले पराजित भएको खेलमा ३८ वर्षीय सिल्भाले घुँडामा चोट बोक्न पुगेका थिए । घुँडामा चोट बोक्न पुगेपछि सिल्भा १९औं मिनेटमा नै मैदानबाट बाहिरिएका थिए ।

उनलाई वेस्ले फोफानाले प्रतिस्थापन गरेका थिए । त्यसपछि यो सिजन खराव प्रदर्शन गरिरहेको चेल्सी दुई गोल खाँदै पराजित हुन पुगेको थियो ।

३८ वर्षीय ब्राजिली कप्तान सिल्भाको सोमबार स्क्यान गरिएको थियो । क्लबले उनी कहिलेसम्म बाहिर रहने भन्ने केही नबताएपनि उनी कम्तीमा पनि ६ साता मैदान बाहिर रहने बुझिएको छ ।

सिल्भा छिटो भन्दा छिटो मैदान फर्कनको लागि क्लबको चिकित्सा विभागसँग नजिकबाट काम गरिरहेको चेल्सीले उल्लेख गरेको छ । सिल्भाले यसै महिना मात्रै चेल्सीसँग २०२३–२४ सम्मको लागि सम्झौता नविकरण गरेका छन् ।

सिल्भाले अर्को साता च्याम्पियन्स लिगको अन्तिम १६ को दोस्रो लेगमा बोरुसिया डर्टमण्डविरुद्धको खेल गुमाउनेछन् । चेल्सी १–० ले पछि छ ।

सिल्भाको चोटले प्रशिक्षक ग्राहम पोर्टरमाथि थप समस्या थपिएको छ । यो सिजन खराब लयमा रहेको चेल्सी २४ खेलबाट ३१ अंक जोडेर १०औं स्थानमा छ । चेल्सी शीर्ष चारको टोटेनहमसँग १४ अंकले पछि छ ।

१५ जनवरीमा क्रिस्टल प्यालेसलाई १–० ले पराजित गरेयता चेल्सीले ६ खेल खेल्दा जित निकाल्न सकेको छ । जसमा ३ बराबरी र ३ हारको नतिजा छ ।