लमजुङ (हाम्रो खेलकुद) – रोयल फ्रेण्डसिप युवा क्लव लमजुङले दोस्रो राइनास कप खुल्ला फुटबल प्रतियोगिताको उपाधि जितेको छ ।

पुर्वी लमजुङको राइनास नगरपालिका वडा नम्वर ६ धमिलिकुवास्थित गौलीटार क्षेत्रीय खेल मैदानमा भएको फाइनलमा कालिका युवा क्लव भण्डारथोक गोरखालाई २–० ले पराजित गर्दै फ्रेण्डसिपले उपाधि जित्न सफल भएको हो ।

उपाधिसँगै रोयल फ्रेण्डसिपले २ लाख रुपैयाँसहित कप, मेडल र प्रमाणपत्र प्राप्त गरेको छ । दोस्रो भएको कालिकाले १ लाख रुपैयाँ, कप र मेडल हात पारेको छ ।

सेमिफाइनलमा पराजित मर्स्याङ्दी युवा क्लव हवाई ग्राउण्ड र विवाईसी भोटेओडारलाई समान २० हजार रुपैयाँ प्रदान गरिएको गौलिटार क्षेत्रिय खेल मैदान समिति अध्यक्ष किरण श्रेष्ठले जानकारी गराएको छ ।

रोयल फ्रेण्डसिपका सागर गुरुङ सर्वाेत्कृष्ट खेलाडी घोषित भए । फ्रेण्डसिपकै रोशन क्षेत्री सर्वाधिक गोलकर्ता तथा फ्रेण्डसिपकै लिलजंग तामाङ उत्कृष्ट गोलरक्षक घोषित भएका छन् । उनीहरु सबैले समान ५ हजार रुपैयाँ र प्रमाण पत्र प्राप्त गरेको छ ।

विजयी टोली तथा खेलाडीलाई गण्डकी प्रदेश सभा सदस्य डाक्टर टकराज गुरुङ, राइनास नगरपालिकामा प्रमुख खड्ग बहादुर गुरुङ, उपप्रमुख पुष्पराज खनाल, प्रमुख प्रशासकिय अधिकृत गोकर्णराज सुयल, राइनास ६ का वडा अध्यक्ष गोविन्दराज चिलुवाल, नेपाली कांग्रेस लमजुङका पुर्व सभापति तुलसीनारायण श्रेष्ठ, विभिन्न राजनितिक दलका प्रतिनिधिसँगै क्लबका पदाधिकारीले पुरस्कृत गरे ।

फागुन १० गतेदेखि सुरु भएको प्रतियोगितामा लमजुङ, गोरखा र तनहुँका गरी विभिन्न १८ टोलीले नकआउटको आधारमा प्रतिस्पर्धा गरेका थिए । गतवर्ष १२ टोलीले प्रतिस्पर्धा गर्दा चक्रतीर्थ युवा क्लब सातविसे लमजुङ पहिलो भएको थियो ।