काठमाडौं (हाम्रो खेलकुद) – सहिद स्मारक ‘ए’ डिभिजन लिगको मार्केटिङ, ब्रोडकास्टिङ र टिकेटिङको जिम्मा पाएको एमडीएसी स्पोर्ट्सले टिकेटिङ पार्टनरको रुपमा इसेवासँग सम्झौता गरेको छ ।

एमडीएसी स्पोर्ट्सका कार्यकारी अधिकृत अर्जुन घिमिरेले टिकटको लागि ईसेवासँग सम्झौता भएको जनाएका छन् । फागुन१९ फागुनदेखि शुरु हुने यसवर्षको सहिद स्मारक ‘ए’ डिभिजन लिगको टिकट ईसेवा एप डाउनलोड गरि वा इसेवाको वेबसाइटबाट टिक खरिद गर्न सक्नेछन् ।

अखिल नेपाल फुटबल संघ (एन्फा) ले टिकटको मुल्य साधरण प्याराफिटतर्फ १ सय र भिआईपी प्याराफिटतर्फ ३ सय रुपैया तोकेको छ । डबल राउन्ड रोविनको आधारमा हुने यसपालीको लिग त्रिपुरेश्वस्थित दशरथ रंगशाला, च्यासलस्थित च्यासल मैदान र एन्फा कम्प्लेक्स सातदोबाटो गरि ३ वटा रंगशालामा हुनेछ ।

लिगको सबै १ सय ८२ खेलको टिकट इसेवामा उपलब्ध हुनेछ । एन्फाले सोमबार मात्रै सहिद स्मारक ए, बी र सी डिभिजन लिगको मुख्य प्रायोजकबाहेक मार्केटिङ, ब्रोडकास्टिङ, डिजिटल र टिकेटिङको सम्पुर्ण अधिकार एमडिएस स्पोर्ट्स प्रालिलाई १ करोड ९७ लाख रुपैयामा बेचेको थियो ।

एमडिएस स्पोर्ट्सले लिगका खेलहरुको प्रत्यक्ष प्रसारण स्पेस फोरके टेलिभिजनबाट गर्नेछ । प्रत्यक्ष प्रसारणका लागि एमडिएस स्पोट्स प्रालि र स्पेस फोरके टेलिभिजनवीच सम्झौता भइसकेको छ । लिगमा सहभागी सबै १४ टोलीले खेलाडी अनुबन्धसँगै प्रशिक्षणलाई पनि तिब्रता दिदै अन्तिम तयारी पुरा गरिसकेको छ । लिगको पहिलो खेलमा नव प्रवेशी खुमलटार युथ क्लब र फ्रेन्ड्स क्लबबीच दशरथ रंगशालामा साँझ ५ः३० बजेपछि हुनेछ ।