काठमाडौं (हाम्रो खेलकुद)– मछिन्द्र एफसीका रक्षक देवेन्द्र तामाङ केपी ओली कप फुटबल प्रतियोगिताको सर्वोत्कृष्ट खेलाडी घोषित भएका छन् ।

उनी सम्मलित टोलीले बुधबार दशरथ रंगशालामा भएको फाइनलमा सातदोबाटो युथ क्लबलाई टाइब्रेकरमा ५–३ ले हराउँदै उपाधि जितेको थियो । निर्धारित समय १–१ को बराबरीमा टुंगिएपछि टाइब्रेकरमा मछिन्द्रले बाजी मारेको थियो ।

देवेन्द्रले उपाधिसहित १ लाख रुपैयाँ प्राप्त गरे । मछिन्द्रकै विशाल श्रेष्ठ उत्कृष्ट गोलकिपर र सातदोबाटोका निरज चौधरी उदयीमान खेलाडी घोषित भए । सातदोबाटोका दीपेनराज सिंह उच्च गोलकर्ता बने । उत्कृष्ट र उच्च गोलकर्ताले समान ५० हजार रुपैयाँ प्राप्त गरे ।

लिग अघि मछिन्द्रलाई उपाधि

मछिन्द्र एफसीले केपी ओली कप फुटबल प्रतियोगिताको उपाधि जितेको छ । दशरथ रंगशालामा बुधबार सातदोबाटो युथ क्लबलाई टाइब्रेकरमा ५–३ ले हराउँदै मछिन्द्रले सहिद स्मारक ए डिभिजन लिग सुरु हुनु दुई दिन अघि उपाधि जितेको छ ।
लगातार दोस्रो दिन दुई फाइनल खेलेको मछिन्द्रले दोस्रो फाइनलमा भने सफलता हासिल गरेको छ ।

झापामा मंगलबार मुस्ताङ भद्रपुर झापा गोल्डकप फुटबलको फाइनलमा मछिन्द्र टाइब्रेकरमै त्रिभुवन आर्मी क्लबसँग पराजित भएको थियो । बुधबार दशरथ रंगशालामा निर्धारित समयको १–१ को बराबरीपछि टाइब्रेकरमा मछिन्द्रले बाजी मारेको थियो । मछिन्द्रका गोलकिपर विशाल श्रेष्ठ टाइब्रेकरका नायक रहे । उनले सातदोबाटोको लागि तेस्रो पेनाल्टी प्रहार गरेका अब्दुल लतिफको पेनाल्टीलाई रोकेका थिए ।

पेनाल्टीमा मछिन्द्रका लागि रन्जित धिमाल, दिवाकर चौधरी, कप्तान सुजल श्रेष्ठ, पुजन उपरकोटी र ओमोलाजा करिमले गोल गरे । सातदोबाटोका लागि निरज चौधरी, दीपनेराज सिंह र एकराज बुढाथोकीले गोल गरे । त्यसअघि निर्धारित पाँचौं मिनेटमा अफिज ओलावाले को गोलमा मछिन्द्रले खेलमा अग्रता लिएको थियो । १८ औं मिने जोर्डन ओवानाको गोलबाट सातदोबाटो खेलमा फर्केको थियो ।

मछिन्द्रले उपाधिसहित १० लाख र सातदोबाटोले ५ लाख रुपैयाँ प्राप्त गर्यो । पूर्व प्रधानमन्त्री तथा नेकपा एमालेका अध्यक्ष केपी ओली, अखिल नेपाल फुटबल संघ (एन्फा) का अध्यक्ष पंकजविक्रम नेम्बाङ, ओलम्पियन दीपक विष्ट, १३ दक्षिण एसियाली खेलकुदमा तेक्वान्दोमा दोहोरो स्वर्ण पदक जितेकी आयशा शाक्यलगायतले विजेता र उपविजेता टोलीका खेलाडीलाई पुरस्कृत गरे ।

राष्ट्रिय युवा संघ नेपालको आयोजनामा फागुन ११ गतेदेखि सुरु भएको प्रतियोगितामा ७ ए डिभिजनसहित ८ टोलीको सहभागिता रहेको थियो ।