काठमाडौं (हाम्रो खेलकुद)– अखिल नेपाल फुटबल संघ (एन्फा) को विवादित बनेको बुधबारको केन्द्रिय कार्यसमिति बैठकले ३ सहायक महासचिव र एक सहायक कोषाध्यक्ष मनोनित गरेको छ ।

३ उपाध्यक्षसहित केन्द्रिय सदस्यहरुले वहिष्कार गरेको बैठकबाट अरुणमान जोशी, वसन्तराज अर्याल र बद्री भट्टराईलाई सहायक महासचिव तथा पूर्णमान चित्रकारलाई सहायक कोषाध्यक्ष मनोनित गरेको हो । जोशी र आर्याल यसअघिको कार्यसमितिमा पनि सोही जिम्मेवारीमा थिए भने चित्रकार एन्फा केन्द्रिय सदस्य थिए । भट्टराईले भने पहिलो पटक एन्फा कार्यसमितिमा मनोनित भएका हुन् ।

सोही बैठकले इटालियन भिन्सेन्जो अल्बर्टो एनेसेलाई नेपाली राष्ट्रिय फुटबल टोलीका मुख्य प्रशिक्षक नियुक्त गरेको एन्फाले जनाएको छ । त्यस्तै एन्फाले नेपाल एपिएफ फुटबल क्लबलाई राष्ट्रिय महिला लिग २०७८ को विजेता घोषित गरेको छ । गत वर्ष पहिलो राउन्डको समाप्तीमा अंकतालिकाको शीर्षस्थानमा रहेको एपिएफलाई विजेता घोषणा गर्ने निर्णय गरेको हो ।

दुई चरणमा गर्ने भनिएको लिगको पहिलो चरण चितवनमा सम्पन्न भएको थियो । अर्को चरण विराटनगरमा आयोजना गर्ने भनिएपनि आयोजना हुन सकेन । पहिलो चरणको समाप्तीमा एपिएफ अंकतालिकाको शीर्षस्थानमा थियो । नेपाल पुलिस क्लब दोस्रो तथा त्रिभुवन आर्मी फुटबल क्लब तेस्रो भएको छ ।

त्यस्तै बैठकले राष्ट्रिय फुटबल टोलीका पूर्व प्रशिक्षक तथा पूर्व कप्तान राजुकाजी शाक्यलाई महिला विभाग, पंकज शाहीलाई ग्रासरुट, नविन महर्जनलाई इलिट युथ र संगित सिंहलाई कोच एजुकेसन विभागको प्रमुख नियुक्त गरेको छ ।

एन्फा कार्यसमितिको बैठक विवादित बनेका कारण निर्णय कार्यान्वयन हुने नहुनेमा शंका देखिएको छ । तीन उपाध्यक्षसहितका असन्तुष्ट पक्षले बैठक वहिष्कार गरेपनि एन्फाले विभिन्न निर्णय गरेको आफ्नो वेबसाइटमार्फत जानकारी गराएको छ । असन्तुष्ट पक्षले आफूहरुको बहुमत रहेको दाबी गरेको छ भने एन्फा अध्यक्ष पंकज विक्रम नेम्बाङले बहुमतका आधारमा निर्णय गरेको दाबी गरेका छन् ।

एन्फा सदस्य रुपेश अधिकारीका अनुसार आफूसहित तीन उपाध्यक्ष विराटजंग शाही, दीर्घबहादुर केसी (कुमार), दीपक खतिवडा, रमेश ब्यन्जनकार, रविन चन्द, महेन्द्र क्षेत्री र पेमा डोल्मा लामा गरि बहिष्कार गरेको जानकारी दिए । केन्द्रिय सदस्य मनीष जोशी भने बैठकमा उपस्थित थिएनन् ।

सदस्य अधिकारीले आफूहरुले महासचिव किरण राई र कोषाध्यक्ष रविन्द्र जोशीको बर्खास्तसहित ५ वटा एजेन्डामा समावेश गर्नका लागि पत्र दिएपनि एन्फा अध्यक्ष नेम्वाङले त्यसलाई अस्वीकार गरेकोले विवाद भएको बताए ।

आफूहरुले महासचिव किरण राई र कोषाध्यक्ष रविन्द्र जोशीको बर्खास्तसहित ५ वटा एजेन्डामा समावेश गर्नका लागि पत्र दिएपनि एन्फा अध्यक्ष नेम्वाङले त्यसलाई अस्वीकार गरेकोले विवाद भएको बताए ।

‘हामीले सुरुवातबाट एजेन्डा समावेश गर्न आग्रह गरेपनि पेलेरै अघि बढ्न खोज्नु भयो । नवौं बुदामा पुग्दा हामीले बैठक बहिष्कार गर्यौं । हामीले उपस्थितिमा पनि हस्ताक्षर गरेका छैनौं,’ अधिकारीले भने, ‘हस्ताक्षर गरिएको भनिएका मध्ये टिकाराम लामाले आफू बहुमतले उठाएको महासचिव र कोषाध्यक्षको बर्खास्तीलाई एजेण्डमा समावेश नगरिएको र बैठक गणपुरुक संख्या नपुगेकोले अवैद्य छ भनेर अध्यक्षलाई नै पत्र बुझाउनुभएको छ । अर्का सदस्य भरतबहादुर बुढ थापाले आफ्नो हस्ताक्षर कीर्ते भएको दाबी गर्दै पत्र बुझाउनुभएको छ । त्यसअर्थ यो बैठकका निर्णय कार्यान्वयन हुने अवस्था देखिन्न ।’