काठमाडौं (हाम्रो खेलकुद)– राष्ट्रिय फुटबल टोलीका पूर्व कप्तान विराज महर्जन ९ वर्षपछि पुनः थ्री स्टार क्लब फर्केका छन् । थ्री स्टारका अध्यक्ष अरुणमान जोशीलगायत पदाधिकारीले शुक्रबार स्वागत गरेका थिए ।

‘ लामो समयपछि थ्री स्टार फर्केको छु । क्लबबाट खेल्ने पनि अब म अन्तिम चरण तिर छु,’ विराजले भने, ‘साच्चै भन्ने हो भने मलाई घर फर्केको महसुस भएको छ । क्लबका अधिकांश दाईहरु पुरानै हुनुहुन्छ । सबैले हार्दिकतापूर्वक स्वागत गर्नुभयो । त्यो देखेर म अन्त्यन्तै खुसी छु ।’

अघिल्लो वर्ष उनले च्यासल युथ क्लबबाट खेलेका थिए । च्यासल गत वर्ष रेलिगेसनमा परेको थियो । त्यसअघिको सिजनल उनले मछिन्द्र क्बलबाट लिग खेलेका थिए । अखिल नेपाल फुलटबल संघ (एन्फा) एकेडेमीका उत्पादन विराजले राष्ट्रिय टोलीबाट भने दुई वर्षअििघ नै सन्यास लिएका थिए विराजकै कप्तानीमा नेपालले बंगबन्धु गोल्डकप र १२औं दक्षिण एसियाल खेलकुद (साग) को उपाधि जितेको थियो ।

नेपालले एएफसी सोलिडारिटी कप जित्दा विराज टोलीका महत्वपूर्ण सदस्य थिए । विराजले यसअघि संकटा, एनआरटी, मनाङ मस्याङ्दी, थ्री स्टार र मछिन्द्र फुटबल क्लबबाट ए डिभिजन लिग खेलिसकेका छन् । विराजले मनाङ, थ्री स्टार र मछिन्द्र क्लबबाट लिगको उपाधि जितिसकेका छन् । मनाङ र मछिन्द्रले उपाधि जित्दा विराज टोलीको कप्तान थिए ।