एजेन्सी – ब्राजिली फरवार्ड रोवर्टो फिर्मिनोले सिजनको अन्त्यसँगै इंग्लिस क्लब लिभरपुल छाड्ने भएका छन् । ३१ वर्षीय फिर्मिनोले यो सिजनको अन्त्यसँगै क्लब छाड्ने निर्णय गरेका हुन् ।

फिर्मिनो विगत ८ वर्षदेखि एनफिल्डमा रहेका छन् । फिर्मिनो २०१५ मा जर्मन क्लब होफेनआइनबाट २९ मिलियन पाउन्डमा लिभरपुलमा आबद्ध भएका थिए । त्यसयता उनी लिभरपुलको महत्वपूर्ण सदस्य छन् ।

फर्मिनोले एनफिल्डमा रहँदा लिभरपुललाई च्याम्पियन्स लिग, प्रिमियर लिग, एफए कप, ईएफएल कप र क्लब विश्वकप जिताउन मद्दत गरेका छन् । उनले लिभरपुलका लागि ३५३ खेल खेलमा १०७ गोल र ७० असिस्ट प्रदान गरेका छन् ।

लिभरपुलका प्रशिक्षक योर्गेन क्लोपले फिर्मिनोलाई क्लबमै राख्ने योजना रहेको बताइरहँदा उनले भने क्लब छाड्ने मनसाय बनाएका हुन् । पछिल्लो समय मांसपेशीको चोटसँगै टोलीमा डिएगो जोटा, लुइस डियाज, डार्विन नुनेज र कोडी गाक्पोको आगमनपछि फिर्मिनोले खेल्ने समय कम भएको छ ।

फिर्मिनोलाई लिभरपुलका समर्थकले उच्च सम्मान राख्ने गर्छन् । उनी लिभरपुलको प्रतिष्ठित आक्रमणको ट्रिओ (मोहम्मद सलाह, साडियो माने र रोवर्टाे फिर्मिनो) का सदस्य हुन् ।

साडियो माने यो सिजनको शुरुमै लिभरपुल छाडेर जर्मन क्लब बायर्न म्युनिखमा अनुबन्ध भइसकेका छन् । सन् २०१९–२० मा लिभरपुलले ३० वर्षपछि प्रिमियर लिगको उपाधि जित्दा उनी टोलीका महत्वपूर्ण सदस्य थिए ।

फिर्मिनोले यस सिजनमा सबै प्रतियोगितामा २६ खेल खेलमा ९ गोल र ४ असिस्ट प्रदान गरेका छन् । चोटकै कारण फिर्मिनोले गत वर्ष कतारमा भएको विश्वकप गुमाएका थिए ।

विश्वकपपछि प्रिमियर लिग सुरु हुँदा फेब्रुअरी १३ मा एभर्टनविरुद्धको डर्वी जितमा उनी वैकल्पिक खेलाडीको रुपमा मदान प्रवश गर्दै पूनरागमन गरेका थिए । त्यसपछिकाे सबै चार खेलमा उनले परिवर्तित खेलाडीकाे रुपमा मात्रै माैका पाएका छन् ।