एजेन्सी – नेपाली राष्ट्रिय फुटबल टोलीका कप्तान एवम् गोलकिपर किरण चेम्जोङ सम्मलित राउन्ड ग्लास पन्जाब आई लिग २०२२/२३ को च्याम्पियन बनेको छ ।

आइ लिगको अन्तिम एक चरणको खेल बाँकी रहँदै पन्जाब शनिबार च्याम्पियन बनेको हो । राजस्थान एफसीलाई शनिबार ४–० ले हराउँदै पन्जाब उपाधि पक्का गरेको हो ।

एक खेल कम खेलेको श्रीनिदी डेक्कनलेब बाँकी दुवै खेल जित्दा पनि पन्जाबलाई नभेट्ने भएपछि टोलीको उपाधि पक्का भएको हो । पछिल्लो ५ खेलमा लगातार जित हासिल गरेको पन्जाबले २१ खेलमा ४९ अंक जोडेको छ । शनिबारको खेलमा पनि किरणले नै टोलीको पोष्ट सम्हालेका थिए ।

जारी सिजनमा १५ खेल जितेको पन्जाबले ४ खेलमा बराबरी र २ खेलमा हार बेहोरेको थियो । २० खेल खेलेको श्रीनिदीको ४१ अंक छ । आई लिग च्याम्पियन भएसँगै पन्जाब इन्डियन सुपर लिगका लागि छनोट भएको छ ।

शनिबार पन्जाबको जितमा लुका माजकेन, जुवान मेरा र हेमिनङथानमावाइले गोल गरेका थिए । यश त्रिपाठीले १६ औं मिनेटमा आत्मघाती गोल गरेको खेलमा माजकेन ४१ औं, मेराले ७६ औं र इन्जुरी समयको पहिलो मिनेटमा हेमिनङथानमावाइले गोल गरे ।
अर्का राष्ट्रिय खेलाडी अन्जन विष्ट सम्मलित केन्क्रे २ खेल बाँकी रहँदा १६ अंकका साथ अंक तालिकाको पुछारबाट दोस्रोमा छ ।