एजेन्सी – आर्सनलले इन्जुरी समयमा गोल गर्दै इंग्लिस प्रिमियर लिगमा शनिबार सनसनीपूर्ण जित निकालेको छ । एएफसी बोर्नमाउथसँग शनिबारको खेल २–० ले पछि परेर आर्सनलले ३–२ को जित निकालेको छ ।

इन्जुरी समयको सातौं मिनेटमा रिस निल्सनको गोलमा आर्सनलले सानदार जित निकालेको हो । कर्नरमा आएको बलमा विपक्षी खेलाडीले हेड गरेपछि प्राप्त बलमा पेनाल्टी बक्स भित्रबाट निल्सनले गोल गरेका थिए ।

आर्सनल पहिलो मिनेटमै खेलमा पछि परेको थियो । बोर्नमाउथका लागि फिलिप बिलिङले गोल गरेका थिए । मार्कोस सेन्सीले ५७ औं मिनेटमा गोल गरेपछि आर्सनल २–० ले पछि परेको थियो । थोमस पार्टेले ६२ औं मिनेटमा गोल गर्दै आर्सनललाई खेलमा फर्काएका थिए । बेन ह्वाइटले ७० औं मिनेटमा आर्सनलका लागि बराबरी गोल गरेका थिए ।

त्यसअघि म्यानचेस्टर सिटीले पनि जित निकालेको थियो । सिटीले न्युक्यासल युनाइटेडलाई २–० ले हराएको थियो। फिल फोडेन र बेर्नार्डो सिल्भाको गोलमा सिटीले लिगको जारी सिजनमा १८ औं जित हासिल गरेको हो ।

खेलको १५ औं मिनेटमा फोडेनको गोलबाट सिटीले अग्रता लिएको थियो । ६७ औं मिनेटमा सिल्भाले गोल थपेपछि सिटीको जित थप सहज बनेको थियो । शीर्षस्थानको आर्सनलको ६१ अंक छ भने दोस्रो स्थानको सिटीको ५८ अंक छ ।